Shillong: Ka MDC yong ka UDP na Nongpoh Constituency, ka Rona Khymdeit da ong ko wa katni ki MDC ka UDP ha Khasi Hills Autonomous District Council (KHADC) em ki ar bynta. Ka wi ka kyrchaan ko ya ka People’s Democratic Forum (PDF) wa yahkhmat da u Pynshngaiñ N Syiem katwa kiwi won kiwa pyrchah ya ka PDF.
Da ong ko leh wa ha ka chong dorbar ka UDP kawa daw man ha kini ki bnai wow wan, ki MDC yong ka UDP ki haap jubab ki ya phang kylli næ kamjooh i pynche na kiwa mihkhmat ka seiñ.
“Kam kawa mihkhmat paidbah ka KHADC nga emhok u wow paan pynche næ wow booh ya ki kylli hakhmat ka Executive Committee, neibhah man i kaamram yong nga hawa nga ym che næ sñiawthooh ya ki mat næ ki rukom krehkaam ha ka Council, wat hadooh wa haap wow paan jubab næ pynche na ki MDC ka UDP kiwa man kam ki EM ha KHADC”. Da ong ka Rona.
Hajrong wa dam noh wow kyrchaan ya ka PDF, ka MDC ka Nongpoh da ong ko wa haap u burom wei wow ngait ya i rai yong ka party wei da pteiñ ko deiwa ong wa ki 4 ngut ki MDC ka UDP kiwa kyrchaan ya ka PDF toh i mon yong ki wei neiliang yong ka ym kwah de ko u ong iyi leh hei yatoh wa ini.
Hei yatoh won wa kwah wow bichaar biang ya ka rai wow dam noh u kyrchaan ya ka PDF, da ong ko wa chong hei stat yong kiwa ha khlieh dooh ka party.
Discussion about this post