I yaleh wow pyntikna yei metyap ki 6 ngut ki Naga kiwa da chah pynyap heiwa yei metyap yong ki da chem ha ka 10 tarik uni u bnai, da wan wow emlang wa ki Doctor chirup kiwa ha-yung ha-sem kiwa khlaad deiwa pait ki pulit wa ki bru ka National Investigation Agency (NIA) ha Jawaharlal Nehru Institute of Medical Sciences (JNIMS) ha ka 11 tarik uni u bnai.
Da phah ar ngut na kawi pa kawi ka yung kiwa khlaad wow pyntikna wa i metyap toh i yong uwon heiwa da sdang nadooh 2:00 waje i sngi wei da pteiñ hadooh wa miet.
Ki 6 tylli ki metyap wa da chem ha ka 13 tarik toh kiwa da suba ki chynrang Naga kiwa da chah rahbor ha ka 13 tarik u May.
Hawa yaklam wa kiwa thoh khubor, u Paisho Thiumai uwa man u diah u Rev. Dr. Manu Thiumai, da khana u boon na kiwa ha-yung ha-sem da chem chitom ki wow ong deiwa tikna neidaw wa ki metyap toh kiwa da sih bha.
Da khana u wa em du uwi donhi uwa yap uwa da ye wow ong deiwa tikna, itæ toh yong u Dilip Thiumai wei uni da yoodur wa da kdoh yei kti u chadien wei noh ya oo hapoh um. Wei du i metyap u Dilip wa dang neh iwi dohi katwa kiwi toh kiwa da chah ah lyngkhot wei kiwa da chah ah khlieh.
Chooh chooh da ong u wa ym em de iwi leh i chyieñ wa dang yabi wei ini toh iwa da yoo chyrkhei wei iwa da pynchrai ya ki wa em kiwa leh kamni.
Da sñiaw dooh kyrmen u leh ya ka sorkar heiwa da sñiaw ki wa kamwa da chah lehke ki deiwa chaniah ha ka sorkar wei da kwah ki leh ya ka sorkar wow pynyoh ko yei hok kini kiwa da khlaad.
Discussion about this post