I yalap Election chiteiñ samoi ha ki le Constituency hanla da kut ko ynnin ka 27 tarik heiwa da yoo aw jan waroh ki Party da tyngkheiñ ki ya ki kyndon wa da booh da ka chnat i chait i khiah heiyatoh wow yada nei poor u khñiang COVID-19.
Hawa yaklam wa u Chief Electoral Officer (CEO), u Federick R Kharkongor hajrong i tyngkheiñ ya ki kyndon da kiwa boon ki seiñ wa ki paidbah, da ong u wa neiliang ka chnat Election da pyrchang ko katwa ye wow khoom u kdoh wymtoh u elaad ya kiwon kiwon wow tyngkheiñ ya kini ki kyndon.
Chooh chooh da ong u wa em ki thaw wa da chem wa em ki seiñ wa tyngkheiñ ya ki kyndon yalap Election wei ym chah de ya ki wow pynman yalang ki wei ka chnat da paan pynche ko na ki kyrtong wa tyngkheiñ kyndon heipor yalap Election.
Heiyatoh wa i tyngkheiñ kyndon, u CEO da ong u wa ki Deputy Commissioner wa ki District Disaster Management Authority (DDMA) em ki i bor wow pynchitom ya kiwa leh pyrchah. Da pyntip u wa da phah u leh ya ki Deputy Commissioner wow leh yeiwa emkaam lada em i tyngkheiñ kyndon COVID-19 heipor yalap Election wei ka DDMA toh u ujor ko pyrchah ya ki.
U Frederick da ong u leh wa heiyatoh wa i yalap Election kawa man ka yalang paidbah, ki DC leh ye ki wow chim ya ki kyndon aiñ pyrchah ya kiwon kiwon lyngba ka DDMA, deiwa pynrap leh wa ka chnat Election da paan ko i kyrchaan na ki seiñ saiñpyrthai, tangwa i tyngkheiñ ya ki kyndon yada COVID-19 toh da ki paidbah neibhah lait na ka Election, ha kiwi ki yachem lang leh, ki paidbah da em bait ki palat yeiwa e bor.
