Ka yakhih da kiwa sikai yong ka Pine Mount School da pteiñ ynne ka sngi heiwa neiliang ki bei ki pa yong ki khynnah skur leh da ya ksohkti lang wow dawa pynbiang ya iwa emkaam hapoh katai ka skur neibynta i bha i miat yong ki khynnah skur.
Kani ka yakhih da sdang nadooh ynnin ka 6 tarik heiwa kiwa sikai da mih ki wow rah ya ki lama yong yow dawa kyrriah noh ya ka Principal wa katni, wei wow pynsñiaw yei pyrchah yei mutlop ki bor pynlai wow pynbiang yeiwa emkaam hapoh yong katai ka skur, nadooh ka um, ki paikhana wa kiwi kiwi.
Neiliang ki kattu katni ki bei ki pa da pynsñiaw ki yei sñiawdiaw hajrong i wym biang yong katai ka skur, neibhah ki khon yong ki hap ki wow em hapoh skur hadooh kamwa 6 kynta deiwa tngit ki paikhana, ym em leh ka um wa ki thaw yalehke iwa da ktah ya ki khynnah.
Da pynsñiaw ki leh wym em i khut yaklam yow pynbait ya iwa emkaam da ka Principal, wei man iwa eh bha wow yachem wa ka Principal hawa emkaam ki, iwa da pynman ya kiwa sikai wym hun lada katai ka Principal u nang pait wei pynlai ya ka skur.
Kawi ka manbei da khana ko wa najrong ka Admission Fees, ha ka chi snem da hap wow su T.2400 na i bynta ka Development Fees wa ka Computer Fees T.600 tangwa ki kor Computer toh kiwa da sih suda.
Kawi won ka manbei da pynsñiaw ko yei khuslai neibynta ki khon kiwa puræ ha Pine Mount, neibhah i wym biang ki thaw lai paikhana wa i wym em ka um da ktah ko yei chait i khiah ki khynnah wei ki paikhana leh man ki kiwa sma bha.
Neiliang ki khynnah da pynsñiaw ki yei kynchiñ yei tngit wei da khana ki yei eh hapoh katai ka skur, neibhah wym em i pynkhooid ya ka skur waroh kawi, nadooh ki paikhana, ka um, ki kynroh man ki kiwa tngit wei da sap da ki thapbawa wei ym jooh em yoo wa ki wakreh lai pynkhooid paikhana ki.
