Jowai : Ynne ka 7 Naichiphaw da pynman ya ka Dorbar Elaka yong ka Elaka Jowai heiwa da yaklam hei yatoh wa kattu katni ki phang.
Ka phang wa da yaklam nyngkong toh chaphang ka chithi wa poi na ka JHADC wa pyrchah ya ka rai wa nyngkong yong ka Dorbar wa da pynman ha u Thohlakhmi (February) 2016 heiwa da rai wym hoi u embynta ki kynthai ha ka Dorbar.
Hei yatoh weini ka JHADC da pyrchah ko ya kani ka rai wei da ong wa kani ka rai pyrchah ko ya ka aiñ ka District Council, neiliang ka Dorbar ynne ka sngi da pyrchah ki ya kani ka chithi wei da yeiñ skem ki ya ka rai wa nyngkong wa ym chah ya ki kynthai u embynta ki ha ka dorbar hajrong ka nongrim wa da yah na ki por nachwa da ki warim wajah.
Kawi won ka phang wa da yaklam toh chaphang ka chithi wow jied Dolloi pura (election) yong ka Elaka ka wow pynman ha u Kmaichonglad (December) heiwa da rai wow man ki khon ka Elaka kiwa yatylli khlem niaw chilliang khmat la ha ka niam ka rukom næ kiwi kiwi wei wym hoi u chah ya kiwa na baar ka Elaka wow embynta ki hei wow jied Dolloi.
Da rai leh wow lai yachem ka Dorbar wa u CEM ka JHADC hei yatoh wa ki kaam ka Elaka.
Ha kani ka Dorbar da wan chimbynta da ki waheh na ki chnong waphær waphær ka Elaka.
Discussion about this post