Jowai : Ka lympung yaleh ball Under 14 wada pynman da ka West Jaiñtia District Sport Association wada man ynnin ka 26 tarik Sngichohthat da em le tylli ki yakhun weiwa da man ko leh ka sngi thap goal heiwa da thap hadooh 17 goal ha kini ki yakhun.
Ki result yong ki le tylli ki yakhun man ki kamni hawah :
Ka yakhun wa nyngkong heipor 10 waje i step ka Dulong SC da jop ko ya ka Newhill SC da 1-0. Ya kani ka goal da thap da u Diangheimon Kyndiah ha chwa u kut ha yakhun ha ka minit wa 57.
Ha ka yakhun wa ar heipor 11:30 da jop ka Ladthadlaboh SC ya ka Khliehiongriang da 11-0. Heiwa hadooh 6 ngut kiwa yaleh yong ka Ladthadlaboh da yoh ki u pynkhih ya ka jaar. Kini ki goal da thap da u Festival Rymbai ha ka minit wa 13, u Heibor Suchiang da thap u ha ka minit wa 45, u Synchar Dhar da thap u ha ka minit wa 33, u Lamhun Dhar uwa da thap ar goal ha ka minit wa 41 wa 50, u Dawanmonmi Mynsong da thap u ar goal ha ka minit wa 26 wa 60, Dowell John Shylla da thap u soo goal ha ka minit wa 34, 37, 43 wa 57.
Ha ka yakhun wa khaddooh heipor 1 waje i sngi ka Moorlong SC da jop ko ya ka 7 Wasa SC da 5-0. Ya kini ki goal da thap da ki ar ngut kiwa kyntup ya u Lalvetnewland Thaite ha ka minit wa 1 wa 38 katwa u Bankerlang Shylla da thap u le goal ha ka minit wa 5, 33, 43.
Discussion about this post