Khliehriat : Ka yalehke ynnin ka 24 tarik ha ka lympung kawa tip kam ka ” 1st Woh Kiang Nangbah Memorial Football Tournament 2016″ kawa pynman da ka Umlyngsha Youth Society & Sports Club (UYSSC), East Jaiñtia Hills da lai bait ko chaphrang ha kani ka sngi chohthat ha Madan Umlyngsha.
Ha ka yalehke kawa nyngkong ha ka por 1 waje i sngi da man ha pyrdi ka T.U. FC wa ka D. Shadong FC heiwa ka yakhun da man sakhiat ko kawa yoosuk wei pynchongchit ko ya ki paidbah wa wan paitke heiwa kini ki dhab da yadrawn chwa ki mar la 4-4 hawa kut i por yalehke katwa kamtæ da raah cha ka penalty shootout heiwa ka T.U. FC da jop ko 5-4 kool.
Ha ka yakhun ka T.U. FC da yoh chwa ko u thap kool lyngba u Tony Talang ha ka minit 3 wa ka minit 21 pynbood won na u Piarly Shadong chi kool ha ka minit 12 tæ hanlada chah thap ko le kool leh ka D. Shadong FC da pyrchang ko u su kylla heiwa ha ka minit chwa u kut u ya dih umsoh da yoh ko u thap chi kool lyngba u Yes Ksih ha ka minit 30.
Ka yakhun ha ka kylla miet won ka D. Shadong da yoh biang ko u thap chi kool lyngba u Samborlang Rymbai ha ka minit wa 34 tae neiliang ka T.U. FC leh da yoh biang ko u thap lyngba u Baitmon Lyngdoh minit wa 53, kawa pynchongchit wei pynhun ko ya ki paidbah paitke ha kani ka sngi toh wa ka D. Shadong FC leh sdang ko u khyrngiat yong bru hadien wa da chah thap ko hadooh 4 kool katwa kamtæ da yakhun sakhiat ki wow yoh u pynuiñ ya ki kol kawa da man sakhiat ko kawa yoosuk heiwa ha chwa u kut i por yalehke ha minit wa 59 wa ka 60+1 da yoh ki u thap sa 2 kool kawa wan lyngba u Iehnoh ksih wa u Harles Nongtdu.
Ka yalehke kawa ar wan heipor 2:45 nohchariñ ka sngi da man hapyrdi ka UYSSC wa ka Thunder FC heiwa ka yakhun da man ko kawa yathaiñ wei yaryngkat bor bha ha ka kylla step tangwa hawa pteiñ ya ka kylla miet ka Thunder FC da jop ko hadooh 3 kool la nod kawa wan chwa lyngba u Deibor Suchiang, bood sa ar kool na u Lam Suchiang ha ka minit 37, 41 wa 52.
Ka yalehke won kawa daw man ha ka 4 tarik u Naichiphaw (October) heipor 1 waje, ka CSK Friend United FC u yaleh ko pyrchah ya ka Lynkien 5man R. FC, Bataw. Heipor 2:45 nohchariñ ka sngi ha pyrdi ka Kid’s United FC wa ka Umsyiem FC, Bataw. Kani toh katkam ka khubor kawa phah lyngba u N.L.Talang Scretary UYSSC, East Jaiñtia Hills.
Discussion about this post