Palat 700 ngut ki khynnah skur da chimbynta ki ha ka Career Guidance Seminar wa pynman da ka yung krehkaam u Deputy Commissioner ka West Jaiñtia Hills ha District Library Auditorium, Mynthong, Jowai deiwa ya krehlang wa ka SPM IAS Academy, Guwahati.
Kiwa chimbynta da wan ki na kylleiñ ka District yow yarap ya ki u jied ki ya ki luti yong ki ha ka puræ puthi.
Da ya emlang ha kani ka Seminar wa u MLA ka Jowai uwa man leh kam u Chairman ka MUDA, u Wailadmiki Shylla, u Deputy Commissioner, u Abhinav Kumar Singh, u Superintendent of Police, u Jaspal Singh Dhanoa deilang u District & Session Judge, WJH, u N.A. Khan, MHJS wa kiwi de.
U Wailadmiki hawa e yei klam da ong u wa ki Career Counselling toh kiwa emkaam yow lait ki khynnah u wiar luti wei da em leh kiwa hadien wa pyndep yei puræ puthi dang sñiaw wiar luti ki iyi wa toh u leh ki.
Da ong u leh wa i dooh kreh katni ym du ya ki wym biang ka puræ puthi tangwa wot ya kitu kiwa da pyndep yei puræ puthi iwa man iwa hap bha wow chimkhia. Kamtæ da emkaam wow yahluti nadooh wa sdang yow lait u jied da la luti wa bakla.
U MLA ha kani ka sngi da e u le ya ka Cheque wa Rs.1 lak cha u Deiwitawan Synnah, uwa rwai wa chna sur wa pawnaam ka District wei yow yarap ya oo leh u sdang u ya ka Music School u.
Discussion about this post