U Montri wa pait ya ka chnat Tourism, u Paul Lyngdoh da ong u wa i klam u President ka Voice of the People Party (VPP), u Ardent M Basaïawmoit toh i klam wa khlem da kitkhlieh, uwa da pynbaad wa ka Concert u Bryan Adams toh ka dawai pynwiar tyrha chipor ‘Painkiller’.
“Ini i klam toh iwa khlem da em i kitkhlieh, neibhah wa i em sakhiat i kiwa kyrchaan yei pyrchang yong ka sorkar wow kyntu ya ki kaam uiñke suwari”, da ong u Paul hawa yaklam wa ki kattu katni kiwa thoh khubor.
Da ong u wa du na kawi ka Concert u Bryan Adams kiwa da yoh myntoi toh ki bru ka jylla yong i hi.
Katkam wa ong u Paul, ki myntoi wa da ye wow yoh nei wan rwai u Bryan Adams toh deiwa pynyoo u Bryan Adams hapoh ki Social Media Account u wa em u da ki Million ngut kiwa bood ya oo. “Da booh u ya ki dur wa wan rwai u ha Shillong, iwa mut wa ki bru na kylleiñ soodong ka pyrthai, wot kitu ki wym pu sñiaw yei pyrtuid ka Shillong leh kattu datip ki kayi ka ka Shillong,” da ong u deiwa pynrap wa kiwi kiwa tem wa rwai kiwa wan cha kani ka jylla da leh ki yeiwa jooh.
Da khana u wa ka that ryndia kawa da pynkup ya u Bryan Adams da pawnaam ko neibhah hadooh 12 tylli ki ryndia u Bryan Adams da paan chooh u yow lai rah cha Canada yow saam won cha ki paralok wa yatem lang wa oo, najrong wa pynyoo pyrthai ya ka Shilllong Airport kawa em ha Umroi.
“Lada chim ya katai ka Concert, i thmu hi toh wow khriñ ya kiwa uiñke suwari cha ka jylla yong i. Kiwa yoh myntoi neini toh nadooh kiwa dai dukan wa kiwi de ki bru yong i”, da ong u.
“Wow ong wa kani toh ka ‘Painkiller’ katæ toh kawa klam khlem da pyrkhat neibhah kiwa yoh nong toh ki bru yong i hi”, da pynrap chooh chooh u Paul.
Hawa yatoh wa i pynbaad ka VPP hajrong i khang ya ki skur neidaw ka Concert, u Paul uwa man leh kam uwa e ktien ka sorkar MDA, da ong u wa ki jooh ki bru kiwa kynthah yei khang ka sorkar ya ki skur, kini ki jooh ki bru wow klam kynthah lada ym khang ka sorkar ya ki skur.
Discussion about this post