Ka United Democratic Party (UDP) da pynsñiaw ko wa i kam wow jop ya kawon kawon ka Election toh u em leh wa ka yurim ym du deiwa kop ha sla. Ini i kynthah yong ka UDP toh hajrong i kam yong ka Voice of the People Party (VPP) wow jop kput ha ka Election MDC wow wan.
U President ka UDP, u Metbah Lyngdoh da ong u, “Lada ki bru ong ki wa ka Party B næ ka Party A wow jop naphang, hajrong kayi ka yurim? Toh u em phi kattu katni ki yurim yow kam yeitæ wei ki bru leh toh u em ki kattu katni ki yurim wow klam hajrong ini”.
U heh ka UDP da ong chooh chooh u wa ka UDP em ko ka hok wow kam wow jop boon ngut bha ha kani ka kynti katkam ka rukom kreh, wei da khana u wa da pynche paidbah yeini ha ka yasyllok paidbah ha ka yalang yong ka General council.
“Ki bru manda puræ wei yoo ki ya ka Report krehkaam, da tikna wa kitu ki wym pu kylla wamut daw kylla noh,” da ong u.
Da ong chooh chooh wa ha kani ka Election MDC, ka Report wei iwa da chem da pynyoo wa ki bru em ki ka rukom pyrkhat kawa phær neibynta ka Election ymtoh kam ha ka Election MLA wa MP.
Chwa ini, ka VPP ha ka sngi wa pyntipmit paidbah ya ki kyrtong yong ka, da pynsñiaw ko wa ki bru toh kiwa kwah dooh wow pynbha ya ka rukom synchaar khadar, i krehkaam wa khooid, wa i pynyatoh wa rap bha wa ki myntoi paidbah, wei kani toh ka thong wa daw lehbha ha ka Election MDC.
Ka Election cha ki ar tylli ki Autonomous District Council (ADC) neibynta ka KHADC wa ka JHADC da sdang chongchit bha ko khamtam nei mih ka VPP kawa man ka seiñ thymme ha ki kaam saiñpyrthai.
Discussion about this post