Shillong: U Working President ka Meghalaya Pradesh Congress Committee (MPCC), u James S Lyngdoh da ong u wa da emkaam wa ha ki District Council wow em ka aiñ wow khang yut seiñ katwa ngait ki MDC.
Da ong wa ka party klam che ko ya ki kyrtong wa paan ticket neibynta ka election MDC poi snem toh u kular ki wym yut ki manda jop ki kam ki MDC.
“Ha u snem 2014 ka Congress da jop ko 11 ngut ki MDC na Khasi Hills Autonomous District Council (KHADC), tangwa katni sah du u Donevan Kharwanlang wa u Lamphrang Blah, lait noh u PT Sawkmie uwa wan na kawi ka party wa u Kimfa Sydney Marbaniang uwa jop ya ka election chiteiñ samoi ha u snem 2016,” da ong u heh ka Congress.
Da ong u wa wot ha JHADC ka party da jop ko 14 ngut ki MDC ha u snem 2014, tangwa katni won sadu 8 ngut.
“Ini i leh ki MDC da pynchitom ko ya ki party neibhah wym em ka aiñ yut seiñ ha ki ADC,” da ong u James.
Ha iwi i liang u heh ka Congress da ong u wa ka party da pynkhreh ko wow booh kyrtong ha waroh 29 tylli ki MDC Constituency yong ka JHADC wa KHADC.
Da ong u wa ka party daw pynbna kyrtong ko ha u Kmaichonglad uni u snem wei da ong u wa kiwa kreh ka party kreh chitom bha ki wow pyntikna wa ka party u jop ko boon ha ka election wow wan.
“Ka Congress daw yoh synchaar ko ha ki district council neibhah ki paidbah da yoo wei da bichaar ki ya kiwi ki party kiwa chwa ka election MLA ong ki wa ym em bynta ki wa ka BJP, tangwa katni da em ki ha ka sorkar jylla chirup wa ka BJP,” da ong uni u heh ka Congress ha ka jylla.
Da ong u wa i wym yoh ka Congress hei bor hadien ka election MLA 2018 toh neidaw wa sihbhah ko, wei miat leh wow chong ko ha ka liang pyrchah teiñ teiñ wei ha kani ka kynti ka party da pynkhreh bha ko nei bynta ka MDC election.
Discussion about this post