U Prestone Tynsong uwa man u National Vice President ka National People’s Party (NPP), da ong u wa ka NPP ha kani ka Election daw jop ko palat 34 ngut ki MLA, heiwa da ong u wa ki paidbah ha ka sien wa nyngkong da kyruiñ ki cha ka NPP.
Da pynksan u leh ya ini i klam deiwa ong wa ha ka sien wa nyngkong wa yoo u yei mih paidbah kiwa jied, wei kani man ko hadien wa da bichaar bha wei wa da sñiawthooh ki wa ka sorkar NPP da rap kreh bha ko bar ya kiwi ki sorkar.
Hajrong i pynbaad ka Congress wa ka sorkar wa yahkhmat da ka NPP yada ko du ya kiwa baamtooh, neiliang u Prestone da kyntait u deiwa ong wa ka sorkar em ko jar i rukom krehkaam wow paitbniah wei wow bichaar ya kiwa chah pynbaad ha ki chnat sorkar. Da ong u wa da em leh u Chief Vigilance Officer wa khlieh da u Chief Secretary heiwa kiwon kiwon ye ki wow pyntip lada em iwon iwon i pynbaad.
Da ong chooh chooh u wa i pynbaad khamtam heipor Election em bait ko, wei du ki pynbaad wa khlem yurim hi, wei weileh leh ki kamtæ toh du neidaw wa kwah ki ya ka Vote wei wow pynkulmar ya ki paidbah.
Heiyatoh wa i kam ka BJP wa ymye wow chna sorkar ha Meghalaya hadien ka Election khlem ka BJP, neiliang uwa yahkhmat ka NPP da ong u wow kam toh iwa suk wei ka NPP leh ye ko wow kam.
Hajrong i maham ka BJP wow mih noh na ka sorkar Meghalaya Democratic Alliance (MDA) deiwa pynbaad wa kani ka sorkar toh kawa baamtooh, tangwa khlem mih won ko. U Prestone da ong u wa ha ki 4 snem piah ym mih kitæ ki pynbaad, iwa phylla toh neiyi i daw wa 4 bnai chwa ka Election mih kam kitæ ki pynbaad wym em yurim.
