U National Vice President ka National People’s Party (NPP), u Prestone Tynsong da ong u wa ka Party daw chim ko yei rai myntu i miet yow jied ya u kyrtong na Ranikor, hadien wa da mih noh u Martin M Danggo wow yakhun na ka BJP, ya uwa ka NPP da dep pynbna ko kam u kyrtong.
Ha iwi i liang, ka NPP Ranikor Block ynne da pynman ko ya ka yalang wa jhan ha chnong Mawthynrew Rangthong, South West Khasi Hills District, neibynta wow jied ya kiwa kitkaam wa thymme wei leh wow ya pyrkhat ya ki kaam yong ka Party hadien wa u M.M. Danggo uwa man u President yong ka NPP ha Ranikor Constituency da ieh noh u ya ka Party deiwa lai wow psiah noh cha ka BJP deilang wa kiwa bood yong oo neibynta wow yakhun ya ka Election na ka BJP.
Ha kani ka yalang jied wa kitkaam thymme yong ka Party NPP Ranikor Block, da yoh President da u Nebi T. Sangma wei da pynthymme leh ya ka Youth Wing wa ya ka Women’s Wing ha katai ka Block.
Ha kani ka jooh ka sngi neiliang ki paidbah yong ka Ranikor Constituency da iwi i sur da rai ki wow pynmih kyrtong na ka NPP deiwa rai wow phah yei pyrtuid yong ki ar ngut, kitæ u Nelbi T. Sangma wa u Kitborlang Nongrem, tangwa ya ka rai wa khaddooh daw yang na ka State Election Committee yong ka Party.
