U MLA ka BJP na South Shillong, u Sanbor Shullai da pynsñiaw u yei sñiawkhia hajrong i wym biang ki thaw sumaar (Rehabilitation Center) ya ki bru kiwa da chah kdoh kynjri hei drugs, heiwa da ong u wa ha kiwi ki jylla ka thaaiñ North East, neiliang ka sorkar India da e poisa ko da ki hajar klur wow seiñ ya ki thaw sumaar, wei pynsñiaw u leh wa du ha Assam da em kamwa 1500 tylli ki thaw sumaar ya kiwa dih drugs kiwa ka sorkar pyrdi da e poisa ko da ki klur.
“Nga kam u MLA ka BJP uwa man kam chibynta ha ka sorkar, i da chna i ya kawi ka Committee wow yakhun yei drugs, wei hadien wa dadep wow pynsñiawthooh yei maa yong u drugs, daw lai cha Delhi ryngkat i tyrwa wow booh ya ki thaw sumaar ya kiwa dih drugs”, da ong u Sanbor.
Da khana u wa dadep wow yaklam leh wa u Montri Rangbah ka jylla, u Conrad K Sangma wei kamjooh wa u Montri ka chnat Social Welfare Department wow ya krehlang, wei neibynta ini emkaam daw lai pait yei thaw ha Mawdiangdiang.
“Daw bood i ya ki kyndon wa emkaam neibynta wow yoh yei thaw sumaar, daw pynkhreh leh ya ka Detail Project Report (DPR) wei daw lai cha Delhi yow paan yei kyrchaan poisa na ka sorkar pyrdi”, da ong u MLA ka BJP.
Ha iwi i liang da ong u kamwa man katni hawa em kiwa ngop hei drugs, ka Committee daw lai ya syllok ko wei hadien won daw phah ya ki cha ki thaw sumaar.
Da ong chooh chooh wa kwah u wa ki khynroo, ki manyung mansem u chim ki ya ka jooh ka luti yow phah ya ka khubor kawa khlan yei maa i sih wa mih nei drugs.
“I emkaam i yei ya krehlang neibhah du ka sorkar samen ym ye ko wow yakhun yei roi i drugs, i emkaam i yei kyrchaan na uwi pa uwi uwa chong chnong”, da ong u Sanbor.
Discussion about this post