Nadooh ka 16 tarik uni u bnai (October), ka sorkar Meghalaya da rai ko wow pynkrehkaam yaki kyndon wa thymme heiyatoh wa u COVID-19.
Ya kiwa psiah chapoh ka jylla nadooh ki tre jylla hadooh kiwa khayi namo kiwa wan wow leh Business hap ki wow leh Rapid Antigen Test kawa hap noh wow su T. 500 samen.
Ya kitu kiwa da dep leh chwa yaka RT-PCR/CBNAT/TrueNAT Test na baar ka jylla wei da yoh Report hapoh 72 kynta ym hap ki wow leh yaka Rapi Antigen Test ha ki Entry point katkam ki kyndon ka ICMR.
Nadooh ka 16 tarik uni u bnai da chah ya kiwon kiwon wow lai phah Test dei mon yong ki hi tangwa hap ki wow su katwa ya kitu kiwa wan na ki manyung BPL ym hap ki wow su wei da kynthup leh ya kiwa em hapoh ka NFSA deiwa rah lang ki ya ka Card yong ki.
I dor Test daka RT-PCR/CBNAAT/TrueNAT man ko T. 3200 ka wi chisien Test katwa yaka Rapid Antigen Test won u man ko T. 500. Kiwa lai Test ha ki Hospital/Lab Private kiwa ym em yoh bor, ka sorkar ym ye ko wow kitkhlieh.
Ki thaw leh Test toh ha Pasteur Institute Shillong, ki Civil Hospital ha Nongpoh, Tura, Nongstoin, Ampati, Baghmara, Williamnagar, CHC Resubelpara, Khliehriat, MCH Jowai, CHC Mawkyrwat, Nazareth, Bethany wa ha Dr. Robert Hospital Shillong.
Tangwa ya kitu kiwa Test da ka sorkar hi kiwa em hei maa wow yoh ya uni u khñiang namo ki High Risk Contact kiwa da booddien da ka District Surveillance Team ym emkaam wow su ki ya ka bai Test.
Daw booh leh yaki thaw wow chong kset deiwa hap dei su (Paid Isolation) wei ya ini da e kti ha ki DC wow khut yalang wa ki tre Hotel kiwa smat wow pynman Corona Care Centre ya ki thaw yong ki wei hadien wa da pynbiat daw pyntip paidbah.
Nadooh ka 16 tarik, ha waroh ki Corona Care Centre wa da booh da ka sorkar daw hap su noh ya ka bai baam kawa waroh chi kattu da e mynkna, heiwa da e kti ha ki DC wow pynbait ya i dor yong uwi u bru katwa ya kiwa wan na ki manyung BPL ym hap su ki. Chah hi leh wow wanrah baam na yung ya ki wym kwah u baam naka Centre.
Da pyntip leh wa da chim ya kini ki rai wa toh neidaw wa nadooh u Naiynñiaw (July) da sangeh wow phah yarap ya ki tiar Test wei ki jylla da hap ki wow thied hi, hanla kiwi ki jylla da sangeh ki da slem tangwa ha Meghalaya hadooh kttæ da Test hi ko dei mynkna wei wow e baam mynkna.
