U National President ka National People’s Party (NPP) uwa man leh kam u Montri Rangbah ka jylla Meghalaya, u Conrad Kongal Sangma da ong u wa ka NPP ym ye ko wow pdiang yei pynkrehkaam ya ka Uniform Civil Code. Da ong u wa kani daw ktah bha ko yei man tynre wa ka rukom im ki jatibru ri-loom ha ka thaaiñ mihsngi ka ri, khamtam ya ka jylla Meghalaya kawa e jait cha ka bei.
Kam wow kdaw wa u Kmaichonglad (Dec) 2022, u MP ka BJP na Rajasthan ha Rajya Sabha, u Kirodi Lal Meena da wanrah u ya ka Uniform Civil Code Bill, 2020 kam ka Private Bill heiwa da mih leh i pyrchah wa joor na ki seiñ kiwa em ha ka Liang Pyrshah. Yei thmu wow wanrah noh ya ka Uniform Civil Code da klam leh da u Amit Shah ha ka yalang yong ka BJP ha Bhopal, ha ka 22-04-22.
Hawa kylli hajrong i wanrah ya ka Bill wow pynman aiñ ya ka Uniform Civil Code ha ka Dorbar Rajya Sabha, u Conrad da ong u wa ya ka UCC ym ye wow pdiang da ka NPP, wei emkaam wow pynlait yei krehkaam ko yow lait u ktah yei dustur riti wei mantre ki paidbah ka jylla Meghalaya neibhah lada bood ya du iwi i rukom daw ktah ko leh hadooh i hiar pateiñ ki thaw ki bhaw ha hapoh ka jylla kawa e cha ka khon khaddoh katwa cha kiwi da e cha u khon nyngkong.
Da ong u wa kani ka Bill kawa da wanrah ini wa dep ha Rajya Sabha ym toh ka Bill wa da wanrah da ka sorkar, tangwa toh du ka Private Member’s Bill ya kawa chah wow wan wanrah da kiwon kiwon. Da ong u wa em chiboon kiyi kiyi wa hap wow yaklam hawa yatoh wa kani ka Bill wei lada wanrah da ka sorkar daw hap wow pait kam kawon ka jait wanrah ko tangwa kattæ dang eh wow yaklam neibhah da wanrah da u MP dei bor samen u.
U Conrad da ong chooh chooh u wa lada ka UCC da mut ko wow pyrkhiñ wei wow pynkylla sakhiat ya ka dustur riti yong ka jylla Meghalaya, kam ka jylla wei kamjooh ka Party ym ye wow pdiang.
