U Prime Minister Narendra Modi ynne da wai paidbah u ya ka luti rel wa nyngkong ka Mizoram wa kynthup ya ka Rajdhani Express ka wow pynyabi ya ka Aizawl wa ka Delhi.
Yow chna ya ka luti rel Bairabi-Sairang da pynlut Rs. 8,070 klur kawa man leh kam kawi na ki luti rel wa eh bha u chna neidaw i long i man i thaw heiwa i kreh da sdang ha u 2015. Ka luti rel toh kawa lai lyngba 45 tylli ki Tunnel, 55 tylli ki yingkieñ heh wa 87 tylli ki yingkieñ khian.
Ka Bridge No. 144, kawa em ha Sairang da jrong ko palat ya u Qutub Minar deiwa jrong 114 metre wei da man ko leh ka Pier Railway Bridge wa jrong dooh hapoh ka ri.
Neiliang kiwa chong chnong da pynsñiaw ki yei kmen wow yoh luti rel deiwa yooluti wow hiar i dor ki mar ki mata kamjooh yow poi smat ki mar wa emkaam man-ka-sngi. Da ong ki leh wa ka bai luti kattu daw duna ko neibhah nachwa chisien lai da toh Rs. 1000 wei kattu daw hiar cha ka Rs. 300.
Kani ka luti rel daw pynduna ko yei jngai i lai luti, daw pynskuk ko yei kit ya ki mar kamjooh wow pynku ya ki kaam uiñke suwari.
U PM da wai paidbah u ya ki le tylli ki Express Train kitæ ka Sairang (Aizawl)-Delhi (Anand Vihar Terminal) Rajdhani Express, ka Sairang-Guwahati Express wa ka Sairang-Kolkata Express.
Da booh mooyurim u leh neibynta kiwa boon ki kreh wa kynthup ya ka luti rel, ki sarok, ki Sports wa kiwi de wa kynthup ya ka 45 Km Aizawl Bypass Road kawa chongdor palat Rs. 500 klur hapoh ka Prime Minister’s Development Initiative for North East Region (PM-DevINE) Scheme yow pynkyllooid ya ka sor Aizawl yow pynyabi leh cha Lunglei, Siaha, Lawngtlai, Lengpui Airport wa cha Sairang Railway Station.
Neitæ u Thenzawl-Sialsuk Road, u Khankawn-Rongura Road hapoh ka NESIDS (Roads), i chna ya ka yingkieñ ha u sarok Lawngtlai-Siaha, ka Khelo India Multipurpose Indoor Hall wa ka LPG Bottling Plant ha Mualkhang, Aizawl wa kiwi de.
Discussion about this post