Hadien wa uwi u bru da wan u wow kawang moo yei yung ka MLA ka East Shillong kawa man leh kam ka Montri sorkar, ka Ampareen Lyngdoh wa em ha Laitumkhrah, da pyntip wa uni u bru toh uwa da chah ksoh noh ha u kurim ka Ampareen, u Fantin Lakadong deiwa toor cha uni u bru ynne i janmiet heipor kamwa 7:15.
Hawa klam waka Ampareen da khana ko wa katwa dang chong yalang ko wa ki warep da ka Online, da sñiaw yei kieh ki moo ha tnoom yung la kamwa piah næ haap iyi iyi wei da kieh ma kieh wei da toh leh na i bynta wa em ki khian dwar.
Kamtæ ha ini i por da phet ko wow yaklam wa u kurim wei da mih ki cha lait wei da yoo ki ya u bru wa rah da ka wait.
Ini da pynkhyrngiat ko thrut hadooh wa da mih lut kiwa chong chnong, wei da ong ko wa kam kawa mihkhmat paidbah u klam ko yeiwa emkaam u klam.
Da khana ko wa tipmit ko ya uni u bru neibhah heipor Election leh wan hiar thma u ka.
Neiliang u kurim ko, u Fantin Lakadong da ong u wa lada ym smat u wow yoo ya ka wait da mynsoo u chwa wow yoh u ksoh ya uni u bru.
Ka Ampareen da e ngooh ko ya ka dorbar chnong kiwa da wan e yarap wei da kyrpaad ko ya kiwa kyrchaan wow man kiwa jai-jai.
Discussion about this post