U Symbood Montri Rangbah ka jylla, u Prestone Tynsong da ong u wa da yoo lakam u Saket Gokhale da chah ktah i khlieh, neibhah i pynmih u ki pynbaad ya ka sorkar Meghalaya toh khlem u ye u pynsakhiat tangwa toh du deiwa tip hi-eh neini neitai. Ini i klam u Prestone toh hajrong i pynbaad u Gokhale wa ka sorkar Meghalaya da pynemkaam bakla ya ka poisa kawa da poi hadooh T. 632 klur wa da e da ka New Development Bank.
U Prestone da khana u leh wa ka sorkar Meghalaya daw ujor ko da ka mukotduma pynsih naam namo ka Defamation Case pyrchah ya uwa yahkhmat ka All India Trinamool Congress hajrong i pynbaad i wym em yurim pyrchah yei krehkaam ka sorkar.
Da ong u wa uni u bru da pynbaad hi-eh u yei krehkaam ka sorkar wei ini ym toh i sien wa nyngkong tangwa man-i-por iwa pynyoo wa uni u bru kopsar uwa chah ktah i khlieh. Da ong u wa hawa em ki pynbaad toh u em leh ki sabut, tangwa ini i leh yong uni u bru da pynman ya ka sorkar wym neh chah de.
U Prestone da khana u wa em ki kreh (Project) hapoh ka chnat Tourism wa kynthup yei pynmiat ya ka Wards Lake (Nan Polok), i pynmiat pynbha ya ha Crinoline, i pynbha ya ki Convention Center ha Orchid Lake Resort, wow pynbha ya ka Umiam Water Sports Complex, u pynyoosuk ya ka Kchaaid Nohkalikai wa kiwi kiwi.
Da khana u wa ka sorkar da yoh bhah ko T. 731 klur ym du T. 632 klur kamwa da pynbaad da uwa e ktien ka AITC. Da khana u leh wa katkam ki kyndon ka NDB da emkaam wow em ya ki Special Purpose Vehicle (SPV), wei da leh noh yeini deiwa Register hapoh ka Meghalayan Age Limited katkam ka aiñ, wei pynrap chooh chooh wa ya kine ki Project da pynkrehkaam da ka chnat PWD, ka chnat Tourism wa ka chnat Sports.
U Symbood Montri Rangbah da khana u wa naka T. 731 klur, ka Tender kawa da dep wow khut neibynta ki Project ha ki le tylli ki chnat da man ko du T. 230 klur, katwa ya kiwi ki Project i pynkhreh wow khut ya ki Tender dang lai.
Kamtæ da ong u wa hajrong kini, ki pynbaad u Gokhlae toh iwa khlem yurim.
