Kot ki seiñbhalang yei wym kut de ki daw wa e ka sorkar wym ye pynkrehkaam MRSSA wa ILP

Kiwa yahkhmat yong ki seiñbhalang waphær waphær hapoh ka jylla da yatai sani bha ki hajrong i yoh psiah laitlan ki baar jylla cha Meghalaya wei kamjooh yei wym mano ka sorkar ya ki aiñ yada wa kynthup yei pynkrehkaam ya ka Meghalaya Residents Safety and Security Act (MRSSA), 2016 waka Inner Line Permit (ILP).

Kini ki seiñbhalang kiwa da chong ha ka yalang ha Shillong ynne kynthup ki ya ka FKJGP, KSU, HNYF, JSU, AYWO, FAF wa GSU.

U Sadon Blah uwa man u President ka HNYF da ong u wa ka MRSSA waroh da che neibhah da em ha ka ya ka khyrdop (Entry/Exit Point) waka District Task Force (DTF). Da ong u wa ka sorkar rieh satri ko ha kiwa boon ki bynta, kawi deiwa ong wa ya ka MRSSA dang pynkylla wei ya ka ILP won da ong wa daw ktah ya ka roi ka paar wei daw ktah ya ki kaam uiñke suwari.

Da ong u wa ka sorkar da thok ko ya ki seiñbhalang wa ya ka thaw wow pait bniah COVID da ong wa toh ka Entry wa Exit Point, deiwa ong leh wa katni u Montri Rangbah, u Conrad K Sangma da ong u wa ki baar jylla kiwa wan kreh cha Meghalaya ym emkaam ki ya ka Work Permit, katwa ha ka MRSSA da kdaw wa chwa wa ki baar jylla u wan kreh ki cha kani ka jylla hap ki wow pynyoo lut ya ki kot ki sla ha khyrdop Entry/Exit Point yow yoh bor u psiah.

Related posts

La du Rs. 1 chi churia yoh ka JHADC na ki Cement Factory da ye u su tulop kiwa kreh: Daiapherbha Lamare

December 26, 2024

Kwah u George wow psiah biang cha ka Congress yow yakhun MDC

December 23, 2024

U Sadon da ong u wa i klam u Conrad da ya tyngkhooh ko waka MRSSA wei kamjooh wa ka Interstate Migrants Workmen Act, wei ini toh i wym ye u pdiang neibhah ha ka MRSSA da kdaw che wa wot kiwa wan uiñke suwari leh hap ki wow pyntipmit ya idæ ha ki Entry wa Exit Point.

Da ong u wa lada ka sorkar ong ko wa ya ka MRSSA Amendment dang hap yang ya ka muhor, toh u pynkrehkaam da ka aiñ wa da mynjur ha u 2016. Da ong u wa ini i leh ka sorkar toh wow thok wei pynbiej ya ki paidbah ka jylla wei kamjooh ya ki seiñbhalang.

Neiliang u President ka KSU, u Lambokstarwell Marngar da ong u wa ka MRSSA toh ka aiñ nadooh u 2016, tangwa kawa dang chah kset synduk bait. Da ong u wa u Montri Rangbah da klam kyllaiñ u hajrong i pynkrehkaam ya ka MRSSA, wei neiliang ki seiñbhalang da rai ki wow yarap ya ka sorkar wow pynkrehkaam ya ka aiñ wei daw kynreh ki ya waroh ki baar jylla.

U Dundee C Khongsit, President ka FKJGP da ong u wa i kheiñstiñ yong ka sorkar da pynman ko ya ki seiñbhalang wow choh biang ya ka dwar ka sorkar.