Ka Khasi Students’ Union (KSU) Narpuh Circle ynne i janmiet ka 26 tarik heipor kamwa 5:30 da yoh ki wow ksoh ya kawi ka Truck 407 kawa em ya u Number AS-01GC-2467 kawa kit ya ki baar jylla kiwa rieh hapoh tarpal deilang wa ki bomkala.
Ya katai ka Truck da yoh kem ha Tongseng (Narpuh) wei hawa kylli neiwon wan ki, kitai ki baar jylla da pyntip wa toh kiwa kreh mylla ha Silchar kiwa mut wow lai cha Guwahati.
Tangwa ka seiñ ym em chaniah ko neibhah wa da suba wa kitai ki baar jylla ye u man wa em ki da iwi i thmu, neibhah wa ka COVID-19 Testing Centre ha Ratacherra ym em phah hiar ya ki yow Test wei kamjooh ha Infiltration Check Gate ka Ratacherra da yoh ki wow lai khlem em wa pynsangeh, da ong ka seiñ.
Hapoh i yahkhmat u Organising Secretary, KSU Narpuh Circle, u Olanbat Pdang deilang wa ki kattu ngut ki dkhot da ekti ya kini ki baar jylla cha ki pulit ha Lumshnong wow leh katkam ki kyndon aiñ.
Kam wow pynkynmoo wa ka EJNC-KC, dang ha kini ki kajiak sngi da yachem ko wa u DC ka East Jaiñtia Hills hajrong i yoh psiah laitlooid ki baar jylla neibhah wa ka Infiltration Check Gate wa em ha Ratacherra leh ym em krehkaam ko.
Ka kyrwoh na u S.L. Suchiang, Publicity Secretary, KSU Narpuh Circle.
