Shillong: Ha chwa wow kut ka Meghalaya Games 2019-20, ka Meghalaya State Olympic Association, kawa pynman ya kani ka lympung, da yoh mynsien ko na i rukom yalehke ha ki 14 tylli ki jait yakob deiwa ong wa da i yahluti wa biang daw ye u yoh takma haka National Games 2022, kawa daw pynman ha Meghalaya.
“Kmen i wow yoo hadooh katwon man kiwa yalehke wa chait wa khiah,” da ong u MSOA Working President u John F Kharshiing hawa yaklam wa kiwa thoh khubor hei emlang ki MSOA Vice-Presidents u Bor Diengdoh wa u Ian Lyngdoh wa u MSOA General Secretary u Chiranjib Choudhury. “E khublei i ya waroh kiwa yalehke khamtam kitu haka yakob yimpa kiwa hap u yimpa haka um wa dait 10 Degrees. Man ko kawa yoosuk wow yoo yei mynsien kiwa yalehke hanlada yoh takma lane ym em yoh takma ki.”
“Ha kani ka lympung da chem wa kiwa da ku bha kiwa yalehke toh kiwa wan na ki thaaiñ nongkyndong. Da ye ki wow leh palat hawa wyrchaw wa ki tiar ki tar wa ki thaw wa yoh ki wow pynkhreh wa em cha ki chong ki thaw yong ki wei ka MSOA da yooluti ko wa kiwa yalehke daw man kiwa da pynkhreh chooh chooh manda poi u 2022 wei lada yoh ki ya i sikai wa biang ym dam de ki wow yoh takma. Yoosuk leh wow yoo wa ki bei ki pa kini ki khynnah da wan ki na ki thaw nongkyndong wow kyrchaan ya ki khon ki ha Shillong wei manda yaklam wa ki sñiawthooh hadooh katwon e ki yow kyrchaan ya ki khon yong ki,” da ong u Lyngdoh.
“I thong yong ka Meghalaya Games toh yow pynchlur wei kmen i leh wow yoo ya iwa da pynyoo kiwa yalehke,” da ong u Kharshiing. “Manda pyndep ya kani ka lympung, daw phah i yaka bui (Report) wa bniah bha cha ka sorkar yow tip ko kammon wow lai chakhmat.”
Ka MSOA ong ko wa ka Meghalaya Games toh du na sla donhi wei dang boon wow chem ya kiwa em sap wei wow pynwan dur ya ki.
Discussion about this post