Jowai: Kam chibynta ka International Tiger Day, u Prime Minister ka ri u Narendra Modi da pynlait u yei chem namo ka “Results of the fourth cycle of All India Tiger Estimation – 2018,” ha Lok Kalyan Marg ha New Delhi ynnin ka sngi. Katkam i yukheiñ wa da yoh na kani ka Census, da ku i boon ki khla hapoh ka ri cha 2967 ha u snem 2018.
U Prime Minister da ong u wa ini u man ko ka wow sahkynmoo ya ka ri iwa pynyoo leh yei chimkhia ka ri wow yada ya ki khla yong ka. Da yaroh u leh ya waroh kiwa emkti ha kani ka kaam deiwa ong wa wa i jan poi wa em 3000 tylli ki khla hapoh ka ri da pynyoo waka ri man ko kawa da ye u yada wei wow e thaw sah wa biang ya ki khla.
U Modi da ong u leh wa ha kini ki 5 snem ka ri da lai ko cha khmat yow chna ya kiwa boon jait wei heijooh i por i boon ki thaw wa tymmoh i khloo da ku ki. Ki thaw wa da yada “Protected Areas” heiwa ha u snem 2014, da em 692 tylli ki Protected Areas, iwa da ku cha ka 860 tylli ha u 2019. Ki “Community Reserves” da ku ki na 43 tylli ha u 2014 cha 100 tylli katni.
Heiyatoh wa iwa boon dooh ki khla, ka Madhya Pradesh em ko iwa boon dooh deiwa em 526 tylli ki khla, pynbood sa ka Karnataka wa em 524 tylli pynbood sa ka Uttarakhand wa em 442 tylli.
Discussion about this post