U National General Secretary ka National People’s Party (NPP), u Sniawbhalang Dhar da ong u wa i yoh Vote namo ka bhah yoh Vote yong ka Voice of the People Party (VPP) da hiar cha ka 3.71 lak katwa i yoh Vote ka NPP da ku cha ka 2.80 lak ha ka Election cha ki ar tylli ki Autonomous District Council (KHADC wa JHADC) kawa da kut noh ha ka 24 tarik uni u bnai.
Hawa klam wa ki laad pathai khubor, u Sniawbhalang uwa man leh u Symbood Montri Rangbah ka jylla, da ong u wa ka VPP da yoh ko du kamwa 3.71 lak ki Vote ha ka Election District Council na ka 5.70 lak ki Vote wa da yoh ko ha ka Election MP Lok Sabha ha u snem 2024.
“Ini mut i wa ka Vote yong ka VPP da hiar ko du hapoh ka 8-9 bnai wei hadooh u 2028, daw hiar cha ka 80%, wei ym tip phi phi hadooh katwon u kreh chitom i yow man ko kamtæ”, da ong u Sniawbhalang.
Da ong u leh wa NPP da lehbha ko ha kani ka Election cha ki ADC wa dang dep heiwa da ye wow pynku cha ka ka 2.80 lak ka Vote.
“I da da lehbha i wei lada pait phi yei yoh Vote ka VPP kattæ ha kani ka Election MDC heiwa da man ko du kamwa 3.71 lak, katwa ka NPP da yoh ko 2.80 lak, wei i yaphær man ko du 85,000 Vote hawa nujor waka Election MP kawa da man hadooh 3 lak tam ki Vote,” da ong u Sniawbhalang.
Heiyatoh wa i pynbaad u President ka VPP wa da em i pynoo ksoh namo ka Muscle Power iwa pynman ya ka VPP wow yoh du 8 ngut ki MDC heithaw wo yoh u chna ya ka Executive Committee ha JHADC. U Sniawbhalang da ong u wa ka NPP du neiwa jop 13 ngut ki MDC tæ ong ki wa leh deiwa pynemkaam dei ksah, lada ong phi wa pynemkaam dei ksah, ka nongmuna wa khian, ka VPP se kawa dat wei thombor ya ka yung u waheh chnong ka Narwan wei heitu da yoo wa pynemkaam ki dei ksah. Ha Khasi Hills jop ki 17 ngut, i ym em ong i wa pynemkaam ki dei bor ksah, tangwa manda jop i 13 ngut da ong ki wa pynemkaam dei bor ksah wei ini toh iwa bakla, hap i wow burom yei rai ki paidbah.
Ha iwi won i liang, u Sniawbhalang da e khublei u ya ki paidbah ka Jaiñtia Hills wa da em ki yei ngait wei chaniah iwa da pynman ya ka NPP wow jop boon paaid dooh ha JHADC, kamjooh da e khublei u ya ki paidbah yong ka Khasi Hills kiwa da e yei kyrchaan.
“I ye i wow leh rap bha chooh chooh da 50-60%. I burom i leh yei rai yong ki paidbah ka Khasi Hills wa da jop i du 4 ngut”, da ong u.
U Sniawbhalang da pyntikna u leh wa ki lok wa em hapoh ka sorkar MDA ym em ki i thmu wow chna ya ka EC wa thymme ha KHADC neibhah wa ki paidbah da e ki yei rai wa che cha ka VPP, tangwa da pynrap u wa lada ym ye ki wow pynlai chakhmat yei kaam daw pait won hadien kattu katni snem.
Hawa pynsñiaw wa ka VPP da kular ko chiboon kiyi kiyi heipor wa yalap Election, u Sniawbhalang da ong u, “Nga yooluti O wow pyndep ki yei kular ki khnang wa ki paidbah u kmen ki wei lada ym ye ki, ki paidbah daw sñiawsih ki wei daw e por ki le snem”.
Hawa yatoh wa ka JHADC, da ong u wa ka NPP da kular ko wa ka EC wa thymme wa yahkhmat da ka NPP daw leh ko iyi iyi heiyatoh wa i duna poisa ka JHADC.
Ka NPP da chna Executive Committee wa thymme ko ha Jaiñtia Hills Autonomous District Council (JHADC) hadien wa da jop 13 ngut ki MDC deiwa kyrchaan leh 3 ngut ki MDC ka UDP wa 2 ngut ki kyrtong samen. Katwa ha KHADC da hap wow chong ha ka Liang Pyrchah neibhah wa yoh ki du 4 ngut ki MDC na ki 29 tylli ki Constituency.
Discussion about this post