Ka jylla Meghalaya da ye ko wow ku na tre dooh ka kyrdan deiwa kynthih na ka Akanshi-3 cha ka Akanshi-1 hadien wa pynmih ya ka Performance Grading Index (PGI) 2.0 da ka Ministry of Education ka sorkar India neibynta u snem 2025–26.
Ka Meghalaya da yoh Score ko 448 ha u 2024-25 yow em ha ka kyrdan namo ka Grade wa ha tre dooh ka Akanshi-3 tangwa neibynta u 2025-26 da yoh Score ko 525.71 yow ku cha ka Akanshi-1 khlem da hap wow chong ha ka Akanshi-2, iwa mut wa da ku ko ar Grade ha ka chi snem.
Hapoh ka Akanshi-1 Category da em kiwi de ki jylla wa kynthup ya ka Uttar Pradesh, West Bengal, Madhya Pradesh, Chhattisgarh, Bihar, Tripura, Jharkhand, Mizoram, Manipur, Nagaland, Arunachal Pradesh wa Jammu & Kashmir.
Ka PGI Score ka Meghalaya da ku i na uwi snem cha uwi na 401.62 ha u 2022-23 cha 417.90 ha 2023-24, na 448.00 ha u 2024-25 cha 525.71 ha u snem 2025-26, iwa mut da ku da 124 Point ha ki le snem iwa man da jan dap 31%.
Deiwa kheiñ kamni, ka Meghalaya da man ko kawi na ki jylla wa smat dooh u ku hapoh i rukom kheiñ ka PGI heiwa ha u snem 2024-25 ka Meghalaya toh du ka donhi ka jylla wa em hapoh ka Akanshi-3 katwa ha ka Akanshi-2 da em ka Mizoram, Bihar wa Jammu & Kashmir.
Hapoh ka PGI 2.0 da pait ya ki 6 tylli ki phang kitæ ka Learning Outcomes & Quality, Access, Infrastructure & Facilities, Equity, Governance Processes wa Teacher Education & Training, deiwa chim yukheiñ na ka UDISE+, PARAKH Rashtriya Sarvekshan, PM POSHAN, PRABANDH wa Vidyanjali.
Kamwa pynmih kani ka PGI 2.0 yong u 2025-26, ym em jylla de wa em hapoh ka Akanshi-3 wa Akanshi-2 heiwa ha ka Akanshi-1 da em 13 tylli ki jylla kitæ ka Uttar Pradesh, Chhattisgarh, West Bengal, Madhya Pradesh, Bihar, Tripura, Jharkhand, Mizoram, Manipur, Jammu & Kashmir, Nagaland, Arunachal Pradesh wa Meghalaya.
Ha uni u snem ka Meghalaya da yoh ko ya ka Score wa 53% katwa kiwi ki jylla da yei u tam ya ka 50%.
Tangwa deiwa kheiñ ya ki Score kini ki 13 tylli ki jylla wa em ha ka Akanshi-1, ka Meghalaya da em ko hei khaddooh hi.
1. Uttar Pradesh-579.9
2. Chhattisgarh- 578.9
3. West Bengal-578.0
4. Madhya Pradesh-566.8
5. Bihar- 564.8
6. Tripura- 563.4
7. Jharkhand-555.0
8. Mizoram- 549.7
9. Manipur- 547.7
10. Jammu & Kashmir- 547.0
11. Nagaland- 544.2
12. Arunachal Pradesh- 541.7
13. Meghalaya- 525.7
Discussion about this post