Ka sngi wow sahkhanatang ha ka Elaka Shangpung heiwa u Pa Dolloi wa pura ka Elaka, u Waheh Chanki Langbang hadien i yoh u kup yei kyrdan Dolloi ha ka sngi Pyngkat 25 Wisu lyngba ka Jaiñtia Hills Autonomous District Council. Kamtæ ha ka sngi Musiang 8 tarik Naitung wan kawi ka bynta wa kyrpang wa da pyndep ha Yung Langdoh toh ka Ku Tyngkong u Pa Dolloi.
Ha ka yurim i sikai niam hapoh ka Elaka kani toh man ko kawi na ki rukom dustur kawa hap u pyndep daman uwi pa uwi u Dolloi neibynta wow yoh yei tipmit hakhmat ka Duwan ha Yung Langdoh.
Ya ki sarin yong kani ka sngi hei sakhilang ki khon ka Elaka Shangpung deilang ki lok ki jor najan najngai da pyndep ha ki ar bynta heiwa ha ka bynta wa nyngkong yei leh niam ha Yung Langdoh da kdar luti da u Langdoh, u Waheh Ham Lamare neitæ pynbood i pynche pyrnah pyrjin wow tylli kyntien da ki niaw kur wa kynthup ya ka kur Dhar, Sungoh, Phyllei-Langbang, Lamare, Suiam-Langstang, Sutnga-Saioo wa ka Kur Papang katwa ya ki bynta wabood yong ka niam da pyndep hei pynlai u Bor Maji na ka kur Sungoh deilang ka Langdoh.
Chooh chooh ha kani ka sngi neiliang ki khon ka Elaka Shangpung hei pynlai u Connsiderwel Shadap Manner, General Secretary Seinraij Shangpung kam ka dak i kmen i ka-it yei wa dayoh yow Pa Dolloi wa pura ka Elaka da pynman ya ka yalang leh burom heiwa ki khon khynroo khyllood ka Elaka hei riam i bait wa yoophooh yoophieñ da chimbynta ki wow ku tyngkong dei chaad i rwai.
U Pa Dolloi ka Elaka Shangpung, u Waheh Chanki Langbang hei klam da e u i sñiawngooh sñiawburom wakhroo ya waroh ki khon ka Elaka wei kam u khlieh ka niam khlieh ka Elaka wa da yoh yei monjur nadooh ka Dorbar Bru hadooh ka Dorbar Blai kular u leh wow e i chakri wakhooid wa hok ya ki khon ka Elaka waroh khlem da niaw chilliangkhmat.
