Ka Khasi Authors’ Society (KAS) waka Khasi Department yong ka North Eastern Hill University da lai yachem ki ya u Dr. W. R. Kharlukhi, MP ka Rajya Sabha yow yatai hajrong i pyrchang wow kynthup ya ka ktien Khasi ha 8th Schedule ka riti synshaar ka ri India.
Da pyntip ha u MP wa ka ktien Khasi da sahteiñ ko da ki phaw snem, wot hadien wa da dep tipmit ha jylla ya waroh ar tylli ki ktien Khasi wa Garo kam ki ktien pyrdi ka jylla nadooh u snem 2005 wei dang ha u snem wa da dep, ka Dorbar Chna-aiñ ka jylla da dep mynjur ko yei rai hajrong i dawa wow tipmit noh ya ka ktien Khasi wa Garo hapoh ka 8th Schedule.
Neiliang u Dr. W R Kharlukhi da pynsñiaw u yei emkaam wow thooh buit wa ki luti wa biang wa ki chnat sorkar kam waka Department of Official Languages wa kiwi de yow poi cha ka thong.
U MP da ong u wa ha ka Dorbar ka Rajya Sabha daw wanrah u yow yaklam yatai ha ka pali yong ka Zero Hour Notice. U Dr. Kharlukhi da pyntip u leh ki kaam wa yatoh waka ktien Khasi wa Garo deilang waka ILP daw wanrah hapoh ka Parliament yow yatai.
Kam wow pynkynmoo wa kani ka kaam toh kawa da sahteiñ da ki phaw snem nadooh u snem 1978, wot lada ka ktien Khasi da biang pura katkam i emkaam yow yoh yei tipmit wa kynthup leh yeiwa emkaam ka Department of Official Languages.
Ya ini wow yoh yei tipmit ya ka ktien Khasi da yaleh nadooh ki por u Prof. G G Swell, u Hoover Hynniewta, u Hoping Stone Lyngdoh, u Dr. B R Kharlukhi, u P Ripple Kyndiah ter ter tangwa hadooh katni ym pu yoh yei jubab naka Ministry of Home Affairs ka sorkar bei wa kynthup lang ya kiwi ki ktien na kylleiñ ka ri India.