Kiwa yahkhmat ka National People’s Party (NPP) na ka Mylliem Block, ynne ka sngi da e ki da ka dorkhat ha u James Sangma, u Montri ka chnat Forest & Environment hajrong i khuslai yong ki paaid ka Mylliem yei ye wow e yei thaw wa man khloo cha ka Air Force.
Neiliang u James da ong u wa kam ka sorkar ka chimkhia ko lada em kam ini i artatien, wei emkaam wow pynche ya ini, wa i yada ya ki khloo wa em hapoh ka chnat khamtam ki thaw wa mih um toh iwa emkaam bha ha kini ki por yow pyntikna wa ym chah ktah ki.
Kamtæ u James da kular u ya ki bru ka Mylliem deilang wa ka thaaiñ Upper Shillong wa ka sorkar ym em ko yei thmu wow e ya kiwon kiwon ki khloo wa da em hapoh i yada cha ka Air Force. “I kheiñkor i ya ka rymaw, wei booh i hakhmat yei emkaam wow pynneh pynsah ya ka ha waroh ki liang wa ye, khamtam ha ini i por wa i kylla i long i man ka suiñ bneiñ iwa da booh ko hei maa ya waroh ki bru.
Kamtæ da e khublei u ya kiwa yahkhmat ka NPP na Mylliem wa bien ki wow pyrkhat neibynta ka bei rymaw deiwa wanrah ya kani ka phang hakhmat ka sorkar. Deiwa ong wa ka sorkar ka yieñ skem ko hajrong ka thong wow yada wei wow pynneh ya ka rymaw iwa man iwi na ki kaam wa em hakhmat dooh.
