Kular u James ya ki Sikh na Punjab wow yada ya ki jaitbru yong ki wa sah ha Them Metor

Shillong: U montri ka sorkar jylla uwa pait ya ka kaam pohyung, u James K Sangma da ong u wa ka sorkar ka chimkhia ko wow e yada wa pura ya ki Khar Metor wa sah ha Sweeper’s Colony, Them Iewmawlong hadien waka Hynniewtrep National Liberation Council (HNLC) da maham ko yaki lyngba ki laad pathai khubor ha kini ki kajiak sngi wa da dep.

U James da ong u ya ini hadien i yachem wa ki dkhot ka Shiromani Gurdwara Prabhandak Committee (SGPC) ka seiñ yong ki Sikh wa wan na Amritsar, Punjab wei da synran lang da ki Sikh wa sah ha Them Metor.

Hawa yaklam hadien wa kut ka yachem, u James da ong u wa ka sorkar ka chimkhia bha ko ya kani ka kaam, wei da pynjoor ko leh ya i sonteri yong ki pulit wow e yada ya ki bru wa sah ha katai ka thaw.

Hawa yatoh wow kyrriah ya ki Khar Metor na katai ka thaw, da pyntip u wa ya kani ka kaam da pait daka High Level Committee (HLC) wa da khlieh da u symbood montri rangbah, u Prestone Tynsong.

Related posts

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Da pyntip u leh wa ym em kular u iyi ya kani ka bynta neidaw wa ka HLC leh ym pu em dep ko wow bichaar bniah wei ka kaam dang lai ko hadooh katni. Da ong wa du hadien wa dep ka HLC wow bichaar lut wow phah yaki Report ya kani ka kaam, ka sorkar daw ye ko wow chim yaka rai wa khaddooh hajrong kani.

Hawa yaklam won wa uwa yahkhmat ka SGPC u Bhadwant Singh Sialka uwi na kiwa yachem wa u montri, da ong u wa ka sorkar ym toh u kyrriah ko ya ki bru wa sah ha Them Metor neidaw wa da sah ki nadooh ki snem 1853, wei toh u e laad ya ki wow chna ki yaki yung wa pura neibhah kamwa man katni katai ka thaw man ko kawa tngit wa taroi bha.

Da kdaw u leh wa ka Meghalaya High Court da rai cha ka liang yong ki bru wa sah ha katai ka thaw, tangwa i paan pynche i phah pynsakhiat da ka sorkar lyngba ka Shillong Municipal Board (SMB) ym yahap ko neidaw katkam i ong yong kitai ki bru da pyntip ki wa yaki kot ki sla da em chwa waka sorkar.

Choh chooh u Sialka da ong u wa ka SGPC ym em yutip ko chaphang ki bru wa pyrchah yaka aiñ, tangwa waroh toh kiwa ym em chong pyrchah yaka aiñ wei da slem sah ki wei da roi ki.