Jowai : Ka ophis Agriculture wa em ha chrooh ka skur St. Mary Mazzarello ha Jowai ynne ka 6 tarik nadooh 5 waje i step da yoh u yoo i wan yieñ ki warep ka West Jaiñtia Hills iwa da poor cha thaw yieñ ki kari Indica wei kamjooh cha ka sarok lai cha Newhill wa kamjooh kiwa lang khrui ha ka gate kani ka ophis.
Kini ki warep da wan ki da ki spah ngut yow wan chim slip wei wow su ya i bai sboh wa tip kam i Bone Meal Fertilizer iwa dai chiteiñ dor cha kiwa rep hei dor T. 600 chi churia.
Kopsar em wa e khubor hamsaya wa ha uni i snem duna ini i sboh kamtæ neidaw wa slem u saam ya ini i sboh ha uni u snem, ki warep dei teiñsar da wan ki cha kani ka ophis da ki spah ngut yow yoh yei bhah yong ki.
Katkam ka khubor wa da yoh da ong wa ya ki slip yow yoh ya ini i sboh da dep saam nadooh ka sngi wa ar kani ka tayaw wei da phah wan ya ki ynne yow rah ki ya ki sboh wei kamjooh ya kiwa wan chwa wa 100 ngut ye ki u chim slip wei kamjooh u su wei wow rah ya i sboh pyn ha kani ka jooh ka sngi.
Kamtæ boon kiwa rep da suba ki wa duna sboh da wan ki ynne ka sngi yow chim ya ka slip wei kamjooh yow su ya i bai sboh. Heini i ya knieh yoh slip boon kiwa da oor wa jæt sula khamtam heipor wa wai ya ka Gate.
Ki paidbah da ya chlong bait ki ha ka dwar khian wa e slip wei ym em de u yang ki kamwa toh yow yoh ki jar i bhah. Da mih i kulmar neini i daw wei da neh i hadooh i janmiet hadooh wa wan ki pulit yow pyrchang ki u pynbeit yeini tangwa ym ye ki u leh i yi iyi leh.
Hadien ini da wan ki dkhot ka JSU wa kynthup ya u President u Rikut Parein kiwa da ye u yaklam wei kamjooh da pynbor ya ki paidbah u yieñ ki da u laiñ tæ lai beit ini i kaam.
Discussion about this post