Jowai: Ka yakob kynjat bol kawa mar san ngut chiliang watip kam ka 1st Under 16 Tiger Five Football Tournament ha Chilliangraij kawa da pynman kam chibynta i lehkmen leh warom Centenary Celebration yei Yung-Walieh, ha ka sngi Mulong ka 2 tarik uni u bnai da poi ko chawa kut heiwa ki 2 tylli ki dhab wa mih madan wow yaknieh yei naam yong kani ka yakob toh ka Kyrcha Hame Sajiar FC pyrchah ya ka Pamhadem FC.
Chwa wow yoh u sakhi yei pyntawbuit pyntawsap ki ar liang ha kani ka sngi da em ka yalang yahkhmat hei pynlai u Oriland Shylla, Secretary Centenary Celebration Committee wei da yoh leh yei klam e mynsien ya kiwa chimbynta ki waheh wasian ka dong kiwa kynthup ya u C.W. Niangti, Chairman Centenary Celebration Committee, waheh Nelson Roy Pde, Symbood waheh chnong wa na u Wanchwa Dkhar.
Sakhi ya ka yakob ha kani ka janmiet da chem wa i pyntaw buit, pyntaw bor pyntaw sap man ko kawa yoosuk heiwa ha ka chi kylla yong kani ka yakob ka Pamhadem FC da yoh ko u thap chi kool donhi ya ka Kyrchan Hame Sajiar FC na ka ball wa kynjat da u Tremiki Lamurong katwa man da pteiñ won i yaleh ha ka kylla miet ka Pamhadem FC da yoh biang ko u kton sa le tylli heiwa ya kini ki kool waroh da thap da u Tremiki Lamurong kamtæ da kini ki soo tylli ki kool u Tremiki da pynsabud wa ka Pamhadem FC u man ko ka dhab wa yoh u rah yei naam yong kani ka yakob.
Ka Kyrchanhamesajiar FC kam ka dhab wa rem yong kani ka yakob da yoh ko u rah ya ka trophy deilang ka song poisa wa T. 3000 katwa ka Pamhadem FC won kam ka Champion yong kani ka yakob da yoh ko u rah ya ka trophy deilang ka song poisa wa T. 7000, yei naam Best Player yong kani ka yakob darah da u Tremiki Lamurong, yei naam Best Goal Keeper da rah da u Barson Sumer yong ka Pamhadem FC katwa yei naam Top Scorer wan da rah da u Reformer Pale yong ka Kyrchanhamesajiar FC.
Discussion about this post