Ka Seng Samla Laitumkhrah kawa man kam ka Society wa dadep Register da booh Application ko ha ka High Court ka Meghalaya yow man kam kawi na kiwa embynta hei yaleh ya ka mukotduma PIL wa da yaleh da ka Meghalaya and Greater Shillong Progressive Hawkers and Street Vendors Association deilang wa kiwi heiyatoh wa i kyrriah ya kiwa chongdai madan ha Shillong.
Kani ka Seng Samla Laitumkhrah da pynsñiaw ko yei sñiawkhia yei chongdai khlem da yoh bor wei pyrchah ya ka aiñ ha ka thaaiñ Laitumkhrah wei da kwah ki wa ka hukum wa da pynmih da ka High Court neibynta kiwa chongdai ha Police Bazar leh u krehkaam ko ha Laitumkhrah yow kyrriah ya kitu kiwa chongdai khlem License cha sarok kamjooh cha luti lai kjat ki paidbah yow kyllooid noh ki luti ki syngkieñ ya kiwa lai kjat kamjooh ki kari.
Tangwa neiliang ka Hawker Association da pyrchah ko yeini wa kwah ka Seng Samla wow embyntalang ha kani ka PIL neibhah wa da yaklam chwa chaphang waroh kawi ka Shillong ha kani ka mukotduma.
Neiliang ka Additional Advocate General da ong ko wa iwa da leh da ka sorkar kattæ daw pynkrehkaam leh cha kiwi ki thaw suki suki ym du ha Police Bazar wei ym emkaam de wow em kiwi de wow embynta ha kani ka PIL iwa daw ye u pyntyngkleiñ donhi.
Ka yung bichaar da ong ko wa da ap ko leh ya u muktiar ka Seng Samla heiwa kiwa chong chnong khamtam ki khynroo kwah ki wa ki luti syngkieñ u man ki kiwa khooid kiwa kyllooid ha kani ka thaaiñ.
Kamtæ ka High Court da pynmih hukum ko deiwa phah ya ka Shillong Municipal Board wow e Report heiyatoh wa ki Vending License wa da e cha kiwa chongdai madan deilang i pyrtuid ki neibynta ka Laitumkhrah. Da phah le ya ka Municipal Board wow lai leh Inspection yow chem ya kitu kiwa chongdai khlem da yoh License ha kani ka thaw wei wow phah ya ka Report hapoh ka 28 tarik uni u bnai.
Heiyatoh wa i dawa ka Seng Samla Laitumkhrah wow embynta ha kani ka PIL, da chah wow em donhi yow pait u ap khlem da man kam kiwa embynta ha ka PIL wei yeiwa ye u chah won ki u embynta daw chim rai hadien.
Discussion about this post