U heh ka Trinamool Congress (TMC) ha Meghalaya, u Charles Pyngrope da ong u wa kiwa yahkhmat ki seiñ man ki kam ki khlieh ka jhaad heiwa khlem ki daw ngam ko.
Heiyatoh wa i man i long ka Congress katni da ong u wa u Captain toh uwa tlot u wym ye wow yah ya ka jhaad wei daw pynngam u ka.
Da pynrap u leh deiwa ong wa waroh i jait ku wei hiar i kamwa da jooh jia.
Kini ki kyntien u Charles toh hajrong i hiar ka Congress ha Meghalaya heiwa ym em de ko wot uwi leh u MLA ha Assembly khamtam hadien wa mih u Ronnie V. Lyngdoh wow psiah cha ka National People’s Party (NPP).
U Charles uwa jooh man u heh ka Congress da pynche u deiwa ong wa ym em klam pyrchah u ya uwon uwon u bru tangwa ki MLA ye ki wow psiah cha kiwi ki seiñ katkam i sñiaw biang ki.
Da ong u leh wa ki MLA da chah synchaar ki ha ka aiñ Anti-Defection wei ym kwah u wow klam iwon iwon tangwa chong i ha ka Party donhi heiwa lada tlot kiwa yahkhmat daw em bait wow yut.
Hajrong i man ka Congres ha ka jylla, u Charles da ong u wa ym ye u ong wa da yap ko ha jylla wei ym ye u ong leh wa daw man ko kawa da sangeh krehkaam.
Discussion about this post