Ka United Democratic Party (UDP) waka Hill State Peoples Democratic People (HSPDP) da pynsñiaw ki cha ka Committee wa toh wow wanrah noh da ka Office Memorandum (OM) kawa thymme khnang wa i thung kreh thymme u yoh i wow sdang noh.
Hawa klam wa ki laad pathai khubor, kiwa yahkhmat ka UDP wa HSPDP da yachem lang ki ynnin i miet, wei da ong ki wa kwah ki wow wanrah noh da ka Office Memorandum wa thymme neibhah wa kani kawa katni toh kawa hap pynkrehkaam nadooh u snem 1972.
Ki dkhot yong ka Committee wa da thung kyrpang da ka sorkar wow yaklam hajrong ka Roster System wa ka Reservation Policy wa da emlang leh ki dkhot na ka UDP wa HSPDP, da pynsñiaw ki yei sñiawngooh ya ka sorkar kawa da ap yei e yumut yong ki.
U President ka HSPDP, u KP Pangniang da ong u wa kam ka seiñ deilang waka UDP u chim ki yei kitkhlieh wa toh u Review namo u pait bniah biang ya ka Reservation Policy.
Da ong u leh wa kamwa man, da dep ki wow pynsñiaw hakhmat ka Committee wa toh u wanrah noh rap smat ya ka Office Memorandum wa thymme khnang wa i thung kaam u krehkaam i neini chakhmat ymtoh de katkam ka Office Memorandum kawa da pynmih ha ka 10-05-22 kawa krehkaam deiwa kheiñ nadooh u snem 1972.
U Renikton L Tongkhar da ong u wa ka UDP kamwa da dep wow booh ha ka Manifesto yong ka Election MLA wa da dep, itæ yow Review ya ka Reservation Policy, kamtæ hi ki da lai ki chakhmat wa emkaam wow pait wei bichaar bniah biang ya kani ka Policy.
“Kamwa da dep wow phah da ka Committee, i daw phah i sa i thoh hajrong i e yumut yong i kamwa da paan hapoh 15 sngi heiyatoh waka Reservation Policy,” da ong u Renik.
