Ka Montri wa pait ya ki kaam aiñ ha ka jylla, ka Dr. M Ampareen Lyngdoh da ong ko wa ka sorkar daw pyntip ko hawa yatoh wa i thung kreh thymme ha ki chnat sorkar, tangwa ya katni emkaam wow pynsangeh chwa yei thung kreh hadooh wa da ya mynjur lang iwi da waroh ki seiñ saiñpyrthai wei hadien 3 tayaaw daw ye u sñiawthooh kammon u lai chakhmat.
Kam wow pynkynmoo wa ynnin ka sngi, ka sorkar da pynmih ko yei pynbna wow pynsangeh chwa yei pynbna ya ka Result yaleh kreh ha waroh ki chnat sorkar wa kynthup kiwa da pynlai da ka MPSC, ki DSC, Medical Recruitment Board wa Central Recruitment Board wei ini kynthup i leh hadooh yei pynman ya ki Exam.
Ha iwi won i liang, ka Montri da pynbna ko wa ka sorkar jylla da mynjur ko wow chna ya ka Expert Committee neibynta wow bichaar yei e yumut yong ki seiñ saiñpyrthai hajrong i pynthymme ya ka aiñ bhah kreh namo ka Reservation Policy.
Ka Ampareen kawa man leh ka Chairperson yong ka Committee hajrong ka Reservation Roster wa Reservation Policy, da khana ko wa ka Committee da yachem jhan ko ya ka sorkar ynne i step ka 1 tarik wei da rai wow thung ya ka Expert Committee ka wow kynthup ya ki bru chemphang.
Hawa kylli, neiliang ka Ampareen da ong ko wa ym em booh ya iwon iwon i por neibynta ka Expert Committee neibhah wa kam kini ki Committee emkaam wow bood bniah bha ya ki kyndon.
Da pynkynmoo ko leh wa ki seiñ saiñpyrthai toh u phah ki dei thoh ya waroh iwa e yumut ki hajrong i pynbait thymme ya ka Reservation Policy hapoh 15 sngi, wei da khana ko wa em ar tylli ki Party kiwa khlem poi cha ka yalang kawa nyngkong wei ki hap ki wow yaklam biang wa ka sorkar neibynta wow yoh chooh chooh yei che.
Puræ leh: Phah pynsangeh ka sorkar yei pynbna Result kiwa yaleh kreh
