Ka dorbar mang tangka ynne kawa mut leh u wanrah ya ka mang tangka, da pynkut noh ka khlem da wanrah kiwon kiwon ki kaam lait noh wow e ki kyntien kynmoo tympang ya u Shillong MP, u Dr. Ricky AJ Syngkon uwa da khlaad noh ha Gordon Robert Hospital ynnin i miet.
Hawa sdang ka dorbar, neiliang u Lamphang, u Thomas A Sangma da pynbna u wa ki kaam wa da booh u pynman ynne ka sngi u pynsangeh ki wei u pynman du ya ka ‘Obituary References’, katwa ki kaam ka sorkar daw pynbait deiwi tawon.
Neiliang u Chief Minister, u Conrad K Sangma da yahkhmat u wow e ki kyntien sñiawlem deiwa ong wa i khlaad noh u Dr. Ricky toh i dooh wa khroo bha ya ka jylla.
Da kynmoo u leh yeiwa yachem khaddooh u wa u MP ha Delhi 15 sngi nachwa heiwa u Dr. Ricky da pynsñiaw u yei kwah wei angnood u wow wanrah ya ka Social Defence ha Meghalaya. “Oo man u u bru wa bha wei manda yachem wa oo sñiaw kamwa da ya tipmit yatoh lok da boon snem,” da ong u Conrad deiwa pynrap wa u Dr. Ricky toh uwa leh khian bha.
Da kynmoo u leh yeiwa lai ki cha kawi ka yalang heiwa u Conrad slem u wow poi neidaw wa sahkut kari tangwa u Dr. Ricky poi u heipor wa biang wei manda kylli u na oo kammon leh u, u Dr. Ricky da jubab u wa wan u samen deiwa yah da ka Scooty.
U Conrad da khana u leh wa da tip u ya ka khubor wa pat u MP heipor wa dang pait bniah ya ki kot ki sla yong ka mang tangka wei da lai u wut-wut cha Hospital tangwa da tip won wa da khlaad noh u Dr. Ricky.
Da pyntip u leh wa dapoi u cha Hospital deilang ki Deputy Chief Minister, u Prestone Tynsong wa u Sniawbhalang Dhar wei da synraan ki leh hawa kit yei metyap cha Pohkseh.
Neiliang uwa yahkhmat ka Liang Pyrchah, u Dr. Mukul Sangma da ong u wa i dooh noh ya u Dr. Ricky toh iwa khroo, da kynmoo u leh ya oo kam u bru wa em i mynsien yow kreh wei da yoo wa da sdang mihsoh iwa da leh u hapoh ka jylla wa hapoh ka ri.
“Ym em kyntien de wow ong yei mynsien yaichah, i leh khian wei kreh chitom iwa da wanrah u ha kani ka kreh kawa khor dooh,” da ong u Mukul Sangma.
Discussion about this post