U Montri ka sorkar jylla uwa man u MLA ka UDP na Khliehriat, u Kyrmen Shylla da ong u toh u em ka rynsan pynsñiaw paidbah yow ieh hei rai ki paidbah hawa yatoh wa i pynpoi luti rel ha ka thaaiñ Jaiñtia Hills.
“Nga em O i sñiaw wa lada ki paidbah kwah sakhiat ki ya ka luti rel, toh u mankaam ko wei lada ki paidbah pyrchah ki ileh wow pyrchah ya ki. Waroh toh neibynta ki paidbah, wei i ymtoh wow leh ya iyi wa pyrchah ya ki paidbah,” da ong u Kyrmen hawa klam ynne ka sngi.
Hawa kylli hajrong ka rel kit mar, u Montri da ong u wa ki paidbah tip ki kayi ka rel kit mar wei kayi ka rel kit bru.
“Heiwon u bakla i, wei iyi i daw wa ki paidbah pyrchah ki leh ym tip. Nga ngait O wa ha kawi ka sngi daw em ka rynsan wow e laad kammon ki paidbah u rai ki. Ha nga samen kwah oo yeitæ,” da ong u Kyrmen.
Hawa pynsñiaw u wa oo samen ym ye u wow rai ya ini i kaam, da ong u wa man iwa emkaam ya ka sorkar jylla wow pynman yei pynsñiaw paidbah ka wow man ka rynsan ya ki paidbah wow pynsñiaw ki yei sñiaw wei angnood ki yei wanrah luti rel ha East Jaiñtia Hills.
“E laad ya ki paidbah wow rai ya ini i kaam ha katæ ka rynsan, wei lada ki paidbah ong ki ym boi ya ka luti rel, ha katæ ka sng u pynkut syndon (Full Stop) yei kaam wa yatoh wa ka luti rel, wei lada ki paidbah ong ki wa kwah hi ki, ileh wym kyrchaan du ka sorkar ileh wym kyrchaan lang ki seiñbhalang, ki paidbah waroh,” da ong u Kyrmen.
Hawa pynsñiaw wa lada wan ki Company thymme wow booh karkhana ha kawon kawon ka thaaiñ, da jooh em chwa i pynsñiaw paidbah, ileh wym leh lang yeini neibynta ka luti rel yow ye ki paidbah u rai.
“I ye i wow yoh yei pynsñiaw waphær waphær, i e yumut wa i pyrchah hajrong ini, tangwa uwa boon paaid hi daw jop hawa kut,” da ong u Montri.
Discussion about this post