Uwa yahkhmat ka Congress, u AK Antony uwa jooh man leh kam u Defence Minister ka sorkar pyrdi, ynne hawa yaklam wa kiwa thoh khubor da ong u wa u khon yong oo, u Anil Antony uwa yaleh MP kam u kyrtong ka BJP na Pathanamthitta Lok Sabha Seat ha Kerala ymtoh u jop u.
U AK Anthony uwa jooh man leh kam u Chief Minister ka Kerala uwa da em katni 83 snem i rta, da ong u wa u khon u toh u rem u ha u kyrtong ka Congress neibhah i psiah BJP ki khon u toh iwa bakla wei kani ka Election toh kawa emkaam neibynta wow yada yaka ri India.
“Ka Congress da man ko kam ka niam O”, da ong u AK Antony hawa jubab yeiwa kylli kiwa thoh khubor.
U Anil Anthony hawa jubab yeiwa ong u pa u, da ong u wa ka Congress toh kawa em da kiwa yahkhmat kiwa da rim suda wei da kam u wa daw jop u ha Pathanamthitta.
U Anil da psiah u cha ka BJP hadien wym sñiawsuk u yeiwa yachah ka Congress yaka Documentary Film wa da pynmih da ka BBC chaphang u Prime Minister Narendra Modi.
U Modi hawa wan cha Kerala ha u bnai wa dep, da yaroh u ya u Anil Antony deiwa ong wa man u uwa kreh chitom neibynta wow chakri paidbah.
“Ka BJP pynchlur ko ya ki khynroo heini. U kyrtong ka BJP na Pathanamthitta, u Anil K Antony toh uwa em mynsien wow chakri ya ki paidbah. I kaam Politics ha Kerala emkaam ki ya kam kini kiwa dang thymme wei ini toh i daw ki paidbah ka Kerala leh ong ki Abki baar 400 paar,” da ong u Modi.
Ka Pathanamthitta Lok Sabha Seat toh kawa daw yakhun da u kyrtong ka BJP u Anil Antony, ka Congress won da pynyieñ ko da u Anto Antony uwa man kam u MP wa katni katwa ka CPI-M won u pynyieñ ko da u Thomas Isaac.
Discussion about this post