Jowai: U President yong ka seiñ ki warep ka jylla Meghalaya ka Hill Farmers Union (HFU), u Commander Shangpliang da yasaaid u hajrong kiwa boon tylli ki phang ki warep ka jylla da yachem ki ha ka yalang yong ka National Level Conference Consultative Group kawa da pynman ha Lucknow, Uttar Pradesh.
Ha kani ka yalang da emlang leh ki sahep yong ka chnat ka rep ka riang, yong ka sorkar India wa ki heh yong ka National Bank for Agriculture and Rural Development, u Commander Shangpliang uwa mihkhmat ya ka jylla ha katai ka yalang da klam u hajrong i emkaam ya ki symbe kiwa bha, wow pynpoi um cha ki thaw rep, ki jait thung wa chait wa khiah wei kamjooh leh ya ka yaw kawa biang.
Da klam u leh ya iwa emkaam wow kyntu ya ki syme tynre na ka jylla wei kamjooh leh wow yarap hajrong ka rep kawa khlem pynemkaam dawai (Chemical Fertilizer) lane ka rep Organic. Da klam u leh hajrong i emkaam wow pynkrehkaam bha ya ki Scheme ka sorkar India kam ka PM Kisan, ka Scheme chong ngiah na ki bynta ki warep, ka Crop Insurance nalor kiwi kiwi.
Hajrong ka yaw ka haat, u Commander Shangpliang da pynsñiaw u yei emkaam wow yoh ya ki yaw kiwa biang wei wow lait na i chah ban beiñ ha ki Middle Men wei da ban joor u wa toh u wai yaka yaw khappood wa ka Bangladesh kyrpang neibynta ki mar yong ki warep wa kiwi ki rukom pynlai yaw ya ki mar rep mar riang.
Neiliang yong ki bor wa toh u pait yaka chnat rep ka riang yong ka sorkar India da ap ki hajrong ki tai ki pynsñiaw wa kynthup leh ya i eh wa da klam da kiwi de ki warep na kiwi ki jylla wei da kular wow bichaar bniah kawi hadien kawi won, khamtam wow pynsñiaw cha ki bor wa hajrong yong ka sorkar India wa toh u pait yaka rep ka riang.
Discussion about this post