Ka KSU South West Border Circle da pynsñiaw ko yei sñiawkhia wa joor yeiwa kylla rong biang ka wah Prang kawa em ha thaaiñ Elaka Narpuh ka East Jaiñtia Hills District iwa da jia ha kini ki kajiak sngi wei iwa da jia leh man-i-por khamtam manda poi i por slap.
Da suba leh wa ini toh ye u man nei pynlait jakhlia cha kani ka wah iwa da wanrah yei maa wa joor ya ki dohum wei kiwa boon jooh yap ki manda kylla rong syndet kani ka wah.
Ini da ktah i leh yei chait i khiah ki paidbah neibhah boon ki bru wa pynemkaam ya kani ka um wei kiwa baam leh ya ki dakha kiwa na kani ka wah.
Ka KSU South West Border Circle da dawa joor ko na ki bor wa toh u pait yeini khamtam ya ka Meghalaya State Pollution Control Board (MSPCB) wow pynman yei takit hajrong ini wa jia ma jia kamni yow chem tre yei daw wei wow pynchitom leh ya kiwa emkti lada chem ki.
Da dawa leh wow khanglaad yei poi jakhlia cha kani ka wah wei wow pynman ka kamwa man nadooh nachwa kawa khooid wa chngaaiñ.
Discussion about this post