Ka Khynroo Khyllood Chilliangraij Niamtre Committee kam kawi na ki chnat krehkaam ka Dorbar Chnong Chilliangraij kawa da pynkhai pynyieñ ha ka yurim wow pynskem pynskit pynneh pynsah ya ka niam, ka rukom, ka dustur katkam wa da yoh sikai nadooh ki manchwa longchwa.
Ha ka 28 tarik u Naikhynde hapyrdi i sakhilang ki khon ka Niamtre na kiwi ki dong ki chnat da pynman ko ya ka yachemlang wa kyrpang ha Yungwalieh kam ka dak i leh burom ya ka lyngkhooh snem wa 13 snem i lai luti ka Khynroo Khyllood Chilliangraij Niamtre Committee.
Ya kani ka sngi da wan sakhilang da u EMH Passah, Vice-President Seiñraij Jowai, u Arwotki Sumer, General Secretary Seiñraij, u Wyraiki Kharbukhi, Asst. General Secretary ka Seiñraij Jowai, u Khroo Lamsalanki Pariat, President KYM wa kiwi ki waheh wasian, manbei manpa, khynroo khyllood yong ki dong ki chnat waphær.
Kam wow kdar luti ya ki bynta wa chakhmat yong kani ka yalang hei pynlai u D.H. Pde, Waheh Chnong Chilliangraij da yoh i ngoohblai ngoohsyiem na u khynroo Budwanmi Dkhar neitae i klam wa tbian na ka Chanlang Pde wa na ka khyllood Iarika Lanong katwa hei pynkut wan ka Hanlada Rngad, Secretary KKCNC wow e ki kyntien khublei.
U Chanlok Dkhar kam uwi na ki waheh wasian ka Chilliangraij hei klam yong oo da ong u wa ka im Tipbru-Tipblai, ka Kamai Yei Hok, ka Tipkur Tipkha wa ka Sngi Kylliang ka Nongkylliang toh kawi kawa da saiñ yurim ya i ki khon u Niawwasa Wasung ki khon Niawtrep Niawskum, kamtæ kam ki pateiñ kani ka juk toh u sñiaw sarong i wei emkaam leh ya i wow pynjanai chooh chooh i ki da ka luti wa yahaap wei mon i khe u Trekirot.
Neiliang u Wyraiki Kharbukhi hei klam kam u kongsan yong kani ka sngi, da e mynsien u ya ki khon ka Dorbar Chnong Chilliangraij wow man kiwa kitkhia tyrna yei kaamram kam ki khon ka Niamtre neitæ ong u leh kam wa ya kani ka dong ka chnong da saiñ yurim chirup wa ka niam ka rukom, to man leh ki pateiñ kiwa tip u burom u kheiñkor wei wow pynkroo pynjanai yei kyrkhu iwa da yoh khnang wa ka pateiñ hadien habood u lait ko nei wiarnar wiar luti.
Chooh chooh ya kani ka sngi da pynphooh pynphieñ wei pynchongchit pynwyrngia da ki chaad, ki rwai wa da chimbynta da ki khon khynroo khyllood ka chnong Panaliar, KKC Seinraij Jowai wa ki khon ka chnong Chilliangraij.
Discussion about this post