Shillong: Ka BJP-Meghalaya Pradesh ynne ka sngi da kynmoo warom ko ya ka lyngkhooh snem sngi yap wa nyngkong yong u montri rangbahdooh warim ka ri, u (T) Atal Behari Vajpayee ha State Party Office, Shillong.
Kiwa klam ha kani ka sngi da kynmoo tamdien ki ya ki kaam wa da leh u (T) Atal Behari Vajpayee neibynta ka ri wei khamtam ya ka thaaiñ mihsngi waroh kawi. Da man u leh uwi na ki khroo pyrkhat uwa da tyrwa wow sdang ya ka DONER Ministry wow pait ya ki kaam pynroi ha ka thaaiñ mihsngi.
Da pynkup burom leh ya oo da ka Bharat Ratna, da u President ka ri India, u Pranab Mukherjee ha u 2015. Ka sorkar pyrdi hapoh i yahkhmat u Narendra Modi ha u snem 2014 da pynbna ko ya ka sngikha u Vajpayee (25 Kmaichonglad) wow man ko kam ka Good Governance Day.
U Vajpayee leh da man u uwi na kiwa sdang ya ka Party Bharatiya Jana Sangh, neitæ won da pynkha ya ka Bharatiya Janata Party ha u 1980 heiwa u Vajpayee da man u kam u President wa nyngkong yong ka Party. Da man u kam u MP kamwa 10 sien heiwa da chah jied u cha ka Lok Sabha, wei ar sien won cha ka Rajya Sabha.
Da man u kam u MP na Lucknow hadooh u 2009 hadien wa da chongngiah u na i daw wym miat chait de u. Da jooh man u kam u Minister of External Affairs heipor wa synchaar ka sorkar wa yahkhmnat da u Mosarji Desai.
Kiwa em ha kani ka sngi da suki ki kamwa chi minit kam wow kynmoo wei wow ngoohblai neibynta yong oo.
Discussion about this post