Ka Sein Raij Jowai kamwa jooh man ha ki snem wa dadep ha uni u snem leh da pynman ko i kynmoo warom ya ka lyngkhooh snem yap wa 160 u Kiang Nangbah deiwa pynman ya ka yalang ha Madan Myngkoipyrdi heiwa ka Isawanda Laloo, Deputy Commissioner East Khasi Hills District dawan ko wow man kam ka kongsan hei emlang u Guest Speaker yong kani ka sngi u Professor L.S. Gassah.
Kam wow wai khmat ya kani ka yalang kynmoo warom yow Kiang Nangbah, u O.R. Challam, President Seiñ Raij Jowai da e u ki kyntien yahkhmat neitæ u Wyraiki Kharbukhi, Executive Member Seiñ Raij Jowai da e u i ngooh i dem pynbood won ki kyntien pdiang burom na u Dolloi ka Elaka Jowai, u Puramon Kynjing katwa u Arwotki Sumer, General Secretary Seiñ Raij Jowai hawa kut pachat u ki kyntien khublei.
Neiliang ka Seiñ Raij Jowai ha uni u snem da jied kyrpang yow Lammat-O Laloo, Secretary Land Committee Seinraij wow e i klam i kappæ wa kyrpang heiyatoh wow Kiang Nangbah.
U Professor L.S.Gassah hei klam yong oo kam u bru stat bru chemphang da pynwandur yei klam ha kani ka sngi ya kawi na ki mat yakhih yaleh pyrchah u Kiang Nangbah ya ki bor ka sorkar Pharæng kawi tip kam ka dan yung namo ka House Tax wa da pynkrehkaam.
Katkam ki sabut wa yoh u Professor Gassah u puræ nei thoh yong ki British sñiawthooh che u wa ka thong wa ka buit krehkaam hi yong ka sorkar pharæng toh kammon u ye ki u pyndem wei u pynkohngooh ya ki khon ka Ri Jaiñtia hei mon yong ki.
Khana chooh chooh u hadien i chimkti ka sorkar pharæng yei synchaar nadooh u snem 1835 hadooh 1860, ki khon ka Ri Jaiñtia ym em u duk ki u su dan (Tax) laitnoh hap ki u e chisien chisnem na man ki Elaka da ki blang, ki sniang, ki syiar kamwa jooh leh hei por synchaar ki syiem tangwa suki suki ka sorkar pharæng wanrah ko wow pynmih ki dan waphær waphær.
Uni u waheh hei klam yong oo da pynsñiaw u leh yei buit krehkaam ki khon ka Ri Jaiñtia iwa da booh ya ka sorkar pharæng hei doom buit doom budia wow kdaar u sylli.
Khaddooh u Professor L.S. Gassah kyrsu kyntu u ya ki khon ka Ri Jaiñtia kiwa im ha kani ka juk wa che wa stat wow yaleh chooh ki u thooh tre ya ki parom chaphang u Kiang Nangbah neibhah hei ngait yong oo dang em chiboon kiyi kiyi kiwa rieh kiwa kani ka juk ka por dawa ko wow leh yeitæ.
Ka Isawanda Laloo hawa klam kam ka kongsan yong kani ka yalang, najrong ki kyntien niawtang yei man hok man chlur u Kiang Nangbah kam u Klawait ka Ri Jaiñtia, kyrpang leh kyrsu kyntu ko ya ki khon ka Ri Jaiñtia deiwa ong kam wa i khlieh u Kiang Nangbah kyruiñ i cha mihsngi hadien wa pasi ki ya oo, toh i leh kam ki pateiñ kani ka juk u man i kiwa kyruiñ cheitæ i che yong kani ka juk stat dei wow man i leh kitæ kiwa chong chnong wa tip yei hok wa ki kaamram yong i iwa da pynkupbor da ka riti krehkaam ka ri India.
