15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1

Kynmoo warom ka Yung Dorbar ya u SK Sunn

Advertisement ad1
Advertisement ad1
Advertisement ad1

Ka Yung Dorbar yong ka jylla Meghalaya ha ka sngi wa ar yong ka Dorbar Synrai, da kynmoo warom kyrpang ko yei khlaad syndet yong u MLA ka Mawphlang, u Syntar Klas Sunn, wei ini khlaad yong u MLA hapyrdi wa em Dorbar man ko ka sien kawa nyngkong ha ka jylla.

U Montri Rangbah ka jylla, u Conrad K Sangma da pynsñiaw u yei khyrngiat nei khlaad syndet u SK Sunn, wei da pynsñiaw leh yei dooh wa khroo ya ka Yung Dorbar Chna-aiñ. Da ong u wa em ki phang yaklam namo ki Motion wa da wanrah da u MLA ka Mawphlang ha ka Dorbar Mang Tyngka wa toh u yatai biang ynne ka sngi.

Advertisement ad1
Advertisement ad1

Da ong chooh chooh wa rap niar wow em ki MLA kiwa kam u SK Sunn, neibhah wa rah u ya ki phang kiwa ktah ya ka jylla, wei toh uwa da pynkhreh bha ya idæ hawa wanrah u ya kawon kawon ka yatai næ hawa kylli hapoh ka dorbar, iwa ym jooh rap em na kiwi kiwa mihkhmat.

Neiliang uwa yahkhmat ka Liang Pyrchah, u Dr. Mukul Sangma da ong u wa man ko i kthang ya ki paidbah ka Mawphlang wa ya ka yung ka sem neidaw wa khlaad khlem poi pyrkhat yong u MLA. Da ong u wa nadooh wa man u SK Sunn kam u Chief Engineer ka PHE, da man u u bru uwa chimkhia bha wei uwa pynlai yumut bha ya i kaam kam u sahep. 

U Dr. Mukul da ong u wa u SK Sunn kam uwa mihkhmat paidbah ym jooh klam u du yei eh yong ka Constituency, tangwa da wanrah u ya ki yatai kiwa ktah ya ka jylla waroh kawi, heiwa da pynsñiaw u leh yei sñiawsuk wow ap ya ki yatai wa wanrah da u Sunn hapoh ka Yung Dorbar.

Neiliang u Symbood Myntri Rangbah, u Prestone Tynsong da ong u wa man i i dooh wa khroo ya ka jylla, wa du hapoh le snem chiteiñ ka yung dorbar da dooh ko hadooh 5 ngut ki dkhot, i wym pu ju jooh jia ha ki por wa da dep.

Da ong u wa ym sñiaw ye ngait hawa yoh yutip wa u SK Sunn da khlaad noh u, neibhah dang du kamwa 12 sngi chwa dang lai u wow yachem wa oo ha kamra u neibynta ki kaam pynroi hapoh ka Constituency. 

U Prestone uwa man leh u Montri i chait i khiah, da pyntip u leh wa da kyntu ya u Sunn wow chim smat noh ya i tika heiwa u MLA leh da kular u wow leh noh smat.

Da ong chooh chooh u wa u SK Sunn da e yarap u chiboon ya ka jylla nadooh wa man u kam u sahep sorkar yong ka chnat PHE, wei kamjooh kam u bru uwa maya ya ka yalehke Football wei da prat luti u ya kiwa boon ki khynroo ka jylla. 

Kiwi de kiwa da chimbynta wow klam ha ini i kynmoo warom kynthup ki ya u Charles Pyngrope, u Lahkmen Rymbui, u PT Sawkmie, u Renikton L Tongkhar, u HM Shangpliang, u Hamletson Dohling, u Mayralborn Syiem, u Zenith M. Sangma, u AL Hek, u Adelbert Nongrum, u Lambor Malngiang, ka Ferlin CA Sangma, u Wailadmiki Shylla, ka Dr. M. Ampareen Lyngdoh, ka Miani D Shira, u Dasakhiatbha Lamare, u SG Esmatur Mominin, u Saleng A Sangma, u Lazarus M Sangma, u George B Lyngdoh wa u Lamphang ka Yung Dorbar, u Metbah Lyngdoh.

Ya ka dorbar da pynkut ya ka ynne ka sngi katkam ki kyndon lada em kiwa khlaad wei daw pteiñ biang mynstep ka 14 tarik heipor 10:00 waje i step.

Share this:
Previous

Ham booh kyrtong pyrchah ya kiwa ha yung u SK Sunn ha ka Election chiteiñ samoi, kyntu u Saleng

Next

Ku biang kiwa dang yoh palat 200 ngut, hiar ha ki 6 tylli ki District ka Meghalaya