Ki pulit ka West Garo Hills ynnin i janmiet da lai kynreh ki ya i Farmhouse u MDC ka BJP, u Bernard N Marak ya iwa tip kam i Rimpu Bagan iwa em ha Tura, West Garo Hills wei i kynreh ya ini i thaw da neh i hadooh ynne i step heiwa da chem wa da pynemkaam bakla ya ini i thaw.
Ini i lai kynreh toh hadien wa chem wa chah slaitbor kawi ka khynnah ha ki ar ngut ha i thaw wa (Rimpu Bagan) wei da yoh leh ya ki ujor na ki paidbah wa ong wa da leh ya chiboon ki kaam pyrchah aiñ ha ini i thaw.
Ki pulit da ong ki wa u Bernard N. Marak toh uwa jooh man kam u Chairman ka ANVC(B) wei da em u hadooh 25 tylli ki mukotduma (Case) pyrchah ka aiñ.
Ha Rimpu Bagan em i yung wa le mala wa 30 tylli ki kamra ha kiwa da antaad wa da chah slaitbor kani ka khynnah. Da chem leh ya ki khynnah chynrang wa kynthai kiwa dih kiad ha ini i thaw wei da ye noh wow kem ya ki 73 ngut ki kynthai wa chynrang chirup wa u Manager wa kiwa kreh ha ini i thaw.
Da chem leh san ngut ki khynnah (4 ki chynrang wa kawi ka kynthai) kiwa chah kset hapoh iwi i kamra wa langoh ya kiwa da ye wow pyllait wei da ekti noh ya ki cha ka chnat Social Welfare.
Ki pulit da ksoh ki leh 36 tylli ki kari, 47 tylli ki mobile phone, 168268 Ml i kiad, u Crossbow wa ki Dakar, 500 tylli ki Condom wa ka poisa T. 30,000.
Da phah ki ya u Bernard N. Marak wow wan pyndem noh u ha Sadar Police Station, Shillong neibhah hadooh katni dang yut u na kti ka aiñ.
Heiyatoh wa ini u SP ka West Garo Hills da ong da ujor ya ka mukotduma (Case) hapoh ka aiñ Immoral Trafficking (Prevention) Act, 1956.
Neiliang u Bernard lyngba ki kattu katni ki khubor da ong u wa ini waroh toh i leh u Montri Rangbah ka jylla, u Conrad K Sangma neibhah wa tieñ u ya rem u (Conrad) ha ka Election na South Tura.
Hawa kylli hajrong ini na u DGP, u Dr. LR Bishnoi da kyntait u deiwa ong wa ini ymtoh i kaam Politics, tangwa iwa da chem heipor wa kynreh iwa pynyoo i yei kaam pyrchah aiñ wa jia ha ini i thaw.
