Ynnin ka sngi ka yung krehkaam u Dolloi ka Elaka Jowai, da pynman ko ya ka pynsñiaw paidbah namo ka Public Hearing hajrong i thmu wow pynmih noh sa ya kawi ka chnong thymme hapoh ka Elaka ya kawa u tip kam ka Myntdu wa em hajan ka Yingkieñ Myntdu yong u sarok Jowai-Shillong.
Hajrong ini neiliang ka Dorbar Chnong Khliehtyrchi da ong ko wa kani ka dorbar wa pynman hapoh u pood u ang yong ka chnong man ko kawa pyrchah ya ka aiñ neibhah ini i thaw wa pynman ya ka da tip kam ka Yingkieñ Pamblah wei da pynman ya kani ka dorbar khlem yohbor na ka Dorbar Chnong Khliehtyrchi.
Ka Dorbar Chnong da ong ko wa da pynman ko ya i takit hajrong ini i kaam heiwa da chem wa ha kani ka Dorbar da em ki bru kiwa chong wa sah hapoh u pood ka chnong wei da em leh ki bru kiwa wan chong sah na kiwi tawon ki chnong kiwa da chah pynbor wow wan wei wow soi ya ki kot ki sla heiyatoh wa ini i kaam.
Hajrong i ong u Dolloi ka Elaka Jowai, wa em arphaw tylli ki yung hapoh u pood kani ka chnong (thymme), neiliang ka Dorbar Chnong Khliehtyrchi da ong ko wa hanla em kitæ ki yung leh emkaam hi wow paan bor wei wow pyntip leh cha ka Dorbar Chnong.
Chooh chooh da ong wa hawa kdaw pood u Dolloi ha waroh soodong da mih i pyrtuid ki Dorbar Chnong katwa cheiliang sepsngi da kdaw u ya ka Liar Kamkam heiwa da pynche wa kani toh ka liar ymtoh i pyrtuid ka Dorbar Chnong tangwa toh i pyrtuid i thaw donhi.
Hajrong ini i thmu wow pynmih ya ka chnong thymme, neiliang ka Dorbar Chnong Khliehtyrchi da payrchah joor wei da kyntait ko leh yeini chisiendon.
Puræ leh: Pynskem u Dolloi ya ka chnong thymme ka Elaka Jowai ka wow tip kam ka Myntdu
