March 26, 2022
Advertisement
Ynne ka sngi ha ka pynsñiaw paidbah namo ka Public Hearing neibynta u seiñ ya ka chnong thymme hapoh ka Elaka Jowai neibynta ki bru wa chong wa sah hajan ka yingkieñ Myntdu wa em ha sarok Jowai-Shillong, waroh ki bru wada wan chimbynta cha kani ka pynsñiaw paidbah ym em em wa pyrchah yei thmu u seiñ chnong.
Neiliang u Dolloi ka Elaka Jowai, u Puramon Kynjing da chim u wow pynman ya kani ka pynsñiaw paidbah toh hadien wa ki bru wa chong wa sah ha kini ki thaw da dawa ki u yoh noh yaka chnong wa pura yow yoh ya i roi i paar.
Heijooh i por u Dolloi da chim u ya kani ka bor kamwa da e bor da ka aiñ yong ka JHADC katkam “Ka Jaintia Hills Autonomous District (Ka aiñ ban Seng Elaka bad Shnong bad ka Jingjied, Jingthung, ka Bor, ka Jingtreikam bad u Pud treikam jong ki Dolloi/Sirdar bad Waheh Shnong) Act, 2015”.
Kamwa ka aiñ yong ka JHADC da e laad ko u seiñ chnong lada em 20 tylli ki manyung wei wymtoh u duna 50 ngut ki bru wada heh, u Dolloi pyntip u wa heini i thaw ki yung da em ki kamwa 35 yung.
Wei hajrong i dawa u seiñ chnong thymme, dadep paan pynche u na ki bru wa sah ha kani ka thaw wei kamjooh leh da dep sylli lang ki chirup ya u pood u ang, kamtæ chem u wa man iwa biang hi katkam ka aiñ.
Heini i pynsñiaw paidbah najrong ki bru wa chong wa sah ha kani ka thaw da wan chimbynta haroh da ki bru wa em yei thaw i bhaw.
Waroh kiwa klam wa chimbynta da e ki yei kyrchan nei bynta u seiñ yaka chnong thymme hei pyrtuid “Myntdu”.
Hadien wada yoh yei kyrchaan wa pura, neiliang u Dolloi ong u wa lyngba ini wa mih na kani ka pynsñiawthooh paidbah daw pyntip u cha ka Executive Committee yong ka JHADC neibynta u lai chakhmat ya kiwi won ki bynta wa emkaam.
