Hadien wa da pynbna da u Montri ki Kaam Pohyung ka jylla, u Lahkmen Rymbui hapoh ka Yung Dorbar Chna Aiñ wa uwi na kiwa yut na District Jail Jowai uwa tip kam u Shidorki Dkhar toh uwa na ka chnong Thangrain, hajrong ini kiwa yahkhmat ka Dorbar Chnong Thangrain, Elaka Shiliangmyntang da kyntait ki ya ini.
U Waheh Chnong, u Pyrkhatbhami Sungoh da ong u wa da khyrngiat wow sñiaw yeini wa ong u Montri wei da beiñ joor ki leh ya ini i pynmih pyrtuid kulmar hapoh ka dorbar iwa da pynbood naam ya ka chnong neibhah uni da man u ym du uwa yut na patok tangwa uwa da chah bom yap leh ha ki paidbah.
Kamtæ da ong ki wa uni u Shidorki ym toh uwa na chnong Thangrain deiwa kyrpaad ya ka sorkar wow pynche yeini hapoh ka yung dorbar wa u Shidorki Dkhar ym uwa na chnong Thangrain wei wow pyndooh noh leh ya ini na iwa klam u Montri hapoh dorbar kamjooh wow pynbait leh ha kiwi ki thaw wa mih i pyrtuid ka chnong wa yatoh wa u Shidorki.
Da kyntu ki leh ya ki paidbah wym toh u sñiawthooh bakla ki neibhah ka chnong ym tipmit wei ym tip ko iyi iyi ya u Shidorki wei ym em yatoh u wa ka chnong.
Kam wow pynkynmoo wa ini wa dep ka kur Dkhar da kyntait ko wa u Shidorki toh u yong Dkhar.
Puræ leh: Kyntait ka Seiñ Kur Dkhar yei kam kur u Shidorki Dkhar uwi na kiwa yut na Jail
Puræ leh: Chah kem 5 ngut heiyatoh wa i yut Jail, 4 ngut wa chah bom yap: Lahkmen
