Kyntait ki pulit ka Dehradun wa em i yoobeiñ jaitbru iwa yah chei yap u khynroo uwa na Tripura

Ki pulit ka Dehradun da ong ki wa i takit yong ki heiyatoh wa i yap u khynroo wa lai puræ MBA ha Jigyasa University, Dehradun uwa na Tripura uwa tip kam u Anjel Chakma, ym em chem ki iwon iwon i sabut toh neidaw wa yoobeiñ jaitbru, tangwa da jia i hadien wa mih i awri awra hadien wa u Anjel da pyrchah u yeiwa em iwa klam ki kattu katni ki khynroo ha ka thaaiñ Selaqui ka Dehradun.

U Senior Superintendent of Police (SSP) ka Dehradun, u Ajay Singh da ong u wa da pait ki yeiwa mih cha ki Social Media kiwa da ong wa ini da jia i neidaw wa em i sñiaw yaphær jaitbru tangwa ym em chem iwon iwon wa ye wow pynskem yeini.

U SSP da ong u wa nadooh ka 9 tarik uni u bnai hadooh ka 26 tarik kawa man ka sngi wa khlaad noh u Anjel heipor wa dang chah sumaar ym em yoh ka ujor kawa ong wa ini da jia i neidaw wa em kiwa klam beiñ ya ka jaitbru.

Chooh chooh da pyntip u wa ha katai ka sngi wa jia ini, ha ka 9 tarik da em ka lehkmen sngikha wa pynman da uwi uwa chah pynbaad uwa tip kam u Suraj Khwas uwa na Manipur. Wei katkam wa ong ki pulit, u diah u Anjel uwa tip kam u Michael Chakma, da em ki ha kawi ka liang katwa kiwi ki 6 ngut ki bru da em ki ha kawi hi ka liang tangwa da mih i yania hadien wa sñiaw u Anjel yeiwa em iwa klam kini kiwi ki bru hadooh wa poi chei ya kajia wei da mih i yachoh.

Hawa mih i yachoh, u Anjel Chakma wa u diah u da mynsoo ki heiwa u Anjel da mynsoo u na u bud loom wa na rdang wei da chah sumaar u 17 sngi hapoh Hospital.

Related posts

Kynmoo warom ka Seng Khasi Delhi Unit deilang ka NSCT ya ka lyngkhooh sngi yap u Kiang Nangbah

December 30, 2025

Daw yaleh u Sanbor Shullai wow chna ya u mot wa chi rynyieñ u Kiang Nangbah hajan ka KNGC

December 30, 2025

Ki pulit da pyntip ki wa 5 ngut na ki 6 ngut kiwa da mih pyrtuid ha ka FIR da chah kem ki heiwa ar ngut na ki toh kiwa dang hapoh 18 snem heiwa da phah ki cha ki Correction Home, katwa ki 3 ngut kiwi da phah kset ki hapoh patok. Sa uwi won uwa tip kam u Yagyraj Awasthi (22 snem), toh uwa na Nepal wei da yut u wei dang thooh ya oo deiwa pynbna leh ya ka khusnaam wa Rs. 25,000 ya kiwa pyntip.

Tangwa iwa ong ki pulit yaphær i neiwa ong kiwa ha-yung u Anjel deilang kiwi ki Politician wa em ha ka liang pyrchah.

U pa u Anjel Chakma, u Tarun Chakma uwa man kam u chipai ka BSF uwa em ha Manipur, da pynbaad u wa u khon u da chah dat beiñ u ha kini ki bru hadien wa pyrchang u wow yada ya u diah u nei chah klam beiñ ha kini ki bru. Da ong u leh wa kini ki bru da khut pyrtuid u ya ki khon u deiwa ong ya ki kam ki “Chinese Momo” heiwa u Anjel da jubab u deiwa ong wa ki leh toh ki nong India ymtoh kiwa na China wei heini da sai tiar kini ki bru da ki tari wa kiwi ki tiar.