Hadien wa ha u bnai wa dep da mih khubor wa em le ngut kiwa yap neidaw wa oor ka thaw tih mooyong wa em ha Thangskoo kawa dang haap hapoh ka Umpleng OP ka East Jaiñtia Hills District heiwa ka sorkar da kyntait ko yeini deiwa ong wa hei lai takit ki pulit ym em chem ki iyi iyi wa kamni.
Kattæ won da poor ki Video wa da kam wei pynyoo yei em boon ngut ki bru wa mynsoo nei tympdung (Blasting) yow sdang ya kawi ka thaw tih mooyong ha Thangskoo hi.
Ha ini i Video da em ym duna ya 5 ngut ki bru kiwa da chah riñdur kiwa da mynsoo heiwa u bru wa riñ da klam u dei ktien Hindi wei da em leh ki kynthai kiwa yarap ya kini ki chynrang yow sumaar yei kha ki.
Kiwa pyntip yeini wa jia ki wym kwah wow pynmih pyrtuid da ong ki wa ini da jia i ha ka 23 tarik u December 2025.
Da ong ki leh wa ini toh iwa da jia ha Thangksoo hi wei uwi na kiwa mynsoo heini da kit ya oo cha Shillong Civil Hospital wei da chah sumaar hapoh ka 32 Surgical Ward wei i pyrtuid u toh u Ashok Tamang heiwa da khlaad noh u ha ka 1 tarik uni u bnai.
Da pyntip leh wa uni u bru toh uwa em soo ngut ki khon wei sah u ha Ladrymbai wei ka kurim u toh ka bru Pnar.
Hawa kylli na u SP ka East Jaiñtia Hills District heiyatoh wa ini wa jia, da ong u wa ki pulit leh da yoh ki yeini i Video wei da phah wow lai cha Thangskoo tangwa ym em chem wa em iwa jia kam ini.
Da ong u leh wa ha i Video wa da yoh ki pulit ym ye wow pyntikna wa ini i jia i ha Thangskoo wei hawa kylli yeiwa em uwa yap ha Civil Hospital Shillong da ong u wym em tip ki yeitæ.
Discussion about this post